[1278] Kati kammāni vuttāni buddhenādiccabandhunā campāyaṃ vinayavatthusmiṃ dhammikā adhammikā kati. Cha kammāni vuttāni buddhenādiccabandhunā campāyaṃ vinayavatthusmiṃ ekettha dhammikā katā pañca adhammikā vuttā buddhenādiccabandhunā.

[1279] Kati kammāni vuttāni buddhenādiccabandhunā campāyaṃ vinayavatthusmiṃ dhammikā adhammikā kati. Cattāri kammāni vuttāni buddhenādiccabandhunā campāyaṃ vinayavatthusmiṃ ekettha dhammikā katā tayo adhammikā vuttā buddhenādiccabandhunā.

[1280] Yaṃ desitaṃ anantajinena tādinā Āpattikkhandhāni vivekadassinā katettha sammati vinā samathehi pucchāmi taṃ brūhi vibhaṅgakovida. Yaṃ desitaṃ anantajinena tādinā āpattikkhandhāni vivekadassinā ekettha sammati vinā samathehi etante akkhāmi vibhaṅgakovida.

[1281] Kati āpāyikā vuttā buddhenādiccabandhunā vinayaṃ paṭijānantassa visayāni suṇoma te. Chaūnadiyaḍḍhasatā vuttā buddhenādiccabandhunā āpāyikā nerayikā kappaṭṭhā saṅghabhedakā vinayaṃ paṭijānantassa visayāni suṇohi me.