[1320] Codayitvā sārayitvā sammukhībhūtassa kareyya kammaṃ katañca kammaṃ akataṃ bhaveyya Kārako ca saṅgho sāpattiko siyā pañhā mesā kusalehi cintitā.

[1321] Chindantassa āpatti chindantassa anāpatti chādentassa āpatti chādentassa anāpatti pañhā mesā kusalehi cintitā.

[1322] Saccaṃ bhaṇanto garukaṃ musā ca lahu bhāsato musā bhaṇanto garukaṃ saccañca lahu bhāsato pañhā mesā kusalehi cintitā.

[1323] Adhiṭṭhitaṃ rajanāya rattaṃ kappakataṃpi santaṃ paribhuñjantassa āpatti pañhā mesā kusalehi cintitā.