[1324] Atthaṅgate suriye bhikkhu maṃsāni khādati na ummattako na ca pana khittacitto na cāpi so vedanaṭṭo bhaveyya na cassa hoti āpatti so ca dhammo sugatena desito pañhā mesā kusalehi cintitā.

[1325] Na rattacitto na ca pana theyyacitto na cāpi so paraṃ maraṇāya cetayi Salākaṃ dentassa hoti chejjaṃ paṭiggaṇhantassa thullaccayaṃ pañhā mesā kusalehi cintitā.

[1326] Na cāpi āraññakaṃ sāsaṅkasammataṃ na cāpi saṅghena sammati dinnā na cassa kaṭhinaṃ atthataṃ tattheva cīvaraṃ nikkhipitvā gaccheyya aḍḍhayojanaṃ tasseva aruṇaṃ uggacchantassa anāpatti pañhā mesā kusalehi cintitā.

[1327] Kāyikāni na vācasikāni sabbāni nānāvatthukāni apubbaṃ acarimaṃ āpajjeyya ekato pañhā mesā kusalehi cintitā.