[1328] Vācasikāni na kāyikāni sabbāni nānāvatthukāni apubbaṃ acarimaṃ āpajjeyya ekato pañhā mesā kusalehi cintitā.

[1329] Tissitthiyo methunaṃ taṃ na seve tayo purise tayo ca anariyapaṇḍake na cācare methunaṃ byañjanasmiṃ Chejjaṃ siyā methunadhammapaccayā pañhā mesā kusalehi cintitā.

[1330] Mātaraṃ cīvaraṃ yāce no ca saṅghassa pariṇataṃ kenassa hoti āpatti anāpatti ca ñātake pañhā mesā kusalehi cintitā.

[1331] Kuddho ārādhako hoti kuddho hoti garahiyo atha ko nāma so dhammo yena kuddho pasaṃsiyo pañhā mesā kusalehi cintitā.