[1332] Tuṭṭho ārādhako hoti tuṭṭho hoti garahiyo atha ko nāma so dhammo yena tuṭṭho garahiyo pañhā mesā kusalehi cintitā.

[1333] Saṅghādisesaṃ thullaccayaṃ pācittiyaṃ pāṭidesanīyaṃ dukkaṭaṃ āpajjeyya ekato pañhā mesā kusalehi cintitā.

[1334] Ubho paripuṇṇavīsativassā ubhinnaṃ ekupajjhāyo ekācariyo ekā kammavācā eko upasampanno eko anupasampanno pañhā mesā kusalehi cintitā.

[1335] Akappakataṃ napi rajanāya rattaṃ Tena nivattho yena kāmaṃ vajeyya na cassa hoti āpatti so ca dhammo sugatena desito pañhā mesā kusalehi cintitā.