[1355] Ñattikammaṃ katamāni nava ṭhānāni gacchati . osāraṇaṃ nissāraṇaṃ uposathaṃ pavāraṇaṃ sammatiṃ dānaṃ paṭiggahaṃ paccukkaḍḍhanaṃ kammalakkhaṇaññeva navamaṃ . ñattikammaṃ imāni nava ṭhānāni gacchati.

[1356] Ñattidutiyakammaṃ katamāni satta ṭhānāni gacchati . Osāraṇaṃ nissāraṇaṃ sammatiṃ dānaṃ uddharaṇaṃ desanaṃ kammalakkhaṇaññeva sattamaṃ. Ñattidutiyakammaṃ imāni satta ṭhānāni gacchati.

[1357] Ñatticatutthakammaṃ katamāni satta ṭhānāni gacchati . Osāraṇaṃ nissāraṇaṃ sammatiṃ dānaṃ niggahaṃ samanubhāsanaṃ kammalakkhaṇaññeva sattamaṃ. Ñatticatutthakammaṃ imāni satta ṭhānāni gacchati.

[1358] Catuvaggakaraṇe kamme cattāro bhikkhū pakatattā kammappattā avasesā pakatattā chandārahā yassa saṅgho kammaṃ karoti so neva kammappatto napi chandāraho apica kammāraho . pañcavaggakaraṇe kamme .pe. dasavaggakaraṇe kamme .pe. vīsativaggakaraṇe kamme vīsati bhikkhū pakatattā kammappattā avasesā pakatattā chandārahā yassa saṅgho kammaṃ karoti so neva kammappatto napi chandāraho apica kammāraho. Kammavaggo niṭṭhito paṭhamo.