[239] Anādariyaṃ paṭicca ṭhitena uccāraṃ vā passāvaṃ vā karontassa dukkaṭaṃ .pe. ekā paññatti ekā anuppaññatti . Channaṃ āpattisamuṭṭhānānaṃ ekena samuṭṭhānena samuṭṭhāti Kāyato ca cittato ca samuṭṭhāti na vācato.

[240] Anādariyaṃ paṭicca harite uccāraṃ vā passāvaṃ vā kheḷaṃ vā karontassa dukkaṭaṃ .pe. ekā paññatti ekā anuppaññatti . channaṃ āpattisamuṭṭhānānaṃ ekena samuṭṭhānena samuṭṭhāti kāyato ca cittato ca samuṭṭhāti na vācato.

[241] Anādariyaṃ paṭicca udake uccāraṃ vā passāvaṃ vā kheḷaṃ vā karontassa dukkaṭaṃ kattha paññattanti . sāvatthiyā paññattaṃ . kaṃ ārabbhāti . chabbaggiye bhikkhū ārabbha . kismiṃ vatthusminti . chabbaggiyā bhikkhū udake uccārampi passāvampi kheḷampi akaṃsu tasmiṃ vatthusmiṃ . ekā paññatti ekā anuppaññatti . Channaṃ āpattisamuṭṭhānānaṃ ekena samuṭṭhānena samuṭṭhāti kāyato ca cittato ca samuṭṭhāti na vācato. Pādukavaggo sattamo. Pañcasattati sekhiyā niṭṭhitā. Mahāvibhaṅge katthapaññattivāraṃ niṭṭhitaṃ. ----------- Tassuddānaṃ

[242] Parimaṇḍalaṃ paṭicchannaṃ susaṃvutokkhittacakkhunā ukkhittojjagghikā saddo tayo ceva pacālanā khambhaṃ oguṇṭhito ceva kuṭi pallatthikāya ca Sakkaccaṃ pattasaññī ca samasūpaṃ samatittikaṃ sakkaccaṃ pattasaññī ca sapadānaṃ samasūpakaṃ thūpato ca paṭicchannaṃ viññattujjhānasaññinā na mahantaṃ maṇḍalaṃ dvāraṃ sabbahatthaṃ na byāhare ukkhepo chedanā gaṇḍo dhūnaṃ sitthāvakārakaṃ jivhānicchārakañceva capucapu surusuru hattho patto ca oṭṭho ca sāmisaṃ sitthakena ca chattapāṇissa saddhammaṃ na desenti tathāgatā evameva daṇḍapāṇissa satthaāvudhapāṇinaṃ pādukā upāhanā ceva yānaseyyāgatassa ca pallatthikānisinnassa veṭhitoguṇṭhitassa ca chamānīcāsane ṭhāne pacchato uppathena ca ṭhitakena na kātabbaṃ harite udakamhi cāti. Tesaṃ vaggānaṃ uddānaṃ