[295] Anupasampannena uttaridvirattatirattaṃ sahaseyyaṃ kappento dve āpattiyo āpajjati nipajjati payoge dukkaṭaṃ nipanne āpatti pācittiyassa.

[296] Mātugāmena sahaseyyaṃ kappento dve āpattiyo āpajjati nipajjati payoge dukkaṭaṃ nipanne āpatti pācittiyassa.

[297] Mātugāmassa uttarichappañcavācāhi dhammaṃ desento dve āpattiyo āpajjati deseti payoge dukkaṭaṃ pade pade āpatti pācittiyassa.

[298] Anupasampannassa uttarimanussadhammaṃ bhūtaṃ ārocento dve āpattiyo āpajjati āroceti payoge dukkaṭaṃ ārocite āpatti pācittiyassa.