[299] Bhikkhussa duṭṭhullaṃ āpattiṃ anupasampannassa ārocento dve āpattiyo āpajjati āroceti payoge dukkaṭaṃ ārocite āpatti pācittiyassa.

[300] Paṭhaviṃ khananto dve āpattiyo āpajjati khanati payoge dukkaṭaṃ pahāre pahāre āpatti pācittiyassa. Musāvādavaggo paṭhamo.

[301] Bhūtagāmaṃ pātento dve āpattiyo āpajjati pāteti payoge dukkaṭaṃ pahāre pahāre āpatti pācittiyassa.

[302] Aññenaññaṃ paṭicaranto dve āpattiyo āpajjati anāropite aññavādake aññenaññaṃ paṭicarati āpatti dukkaṭassa āropite aññavādake aññenaññaṃ paṭicarati āpatti pācittiyassa.