[335] Mātugāmena saddhiṃ eko ekāya raho nisajjaṃ kappento dve āpattiyo āpajjati nisīdati payoge dukkaṭaṃ nisinne āpatti pācittiyassa.

[336] Nimantito sabhatto samāno purebhattaṃ vā pacchābhattaṃ vā santaṃ bhikkhuṃ anāpucchā kulesu cārittaṃ āpajjanto dve āpattiyo āpajjati paṭhamaṃ pādaṃ ummāraṃ atikkāmeti āpatti dukkaṭassa dutiyaṃ pādaṃ atikkāmeti āpatti pācittiyassa.

[337] Taduttariṃ bhesajjaṃ viññāpento dve āpattiyo āpajjati viññāpeti payoge dukkaṭaṃ viññāpite āpatti pācittiyassa.

[338] Uyyuttaṃ senaṃ dassanāya gacchanto dve āpattiyo Āpajjati gacchati āpatti dukkaṭassa yattha ṭhito passati āpatti pācittiyassa.