[343] Udake kīḷanto dve āpattiyo āpajjati heṭṭhāgopphake udake kīḷati āpatti dukkaṭassa uparigopphake udake kīḷati āpatti pācittiyassa.

[344] Anādariyaṃ karonto dve āpattiyo āpajjati karoti payoge dukkaṭaṃ kate āpatti pācittiyassa.

[345] Bhikkhuṃ bhiṃsāpento dve āpattiyo āpajjati bhiṃsāpeti payoge dukkaṭaṃ bhiṃsāpite āpatti pācittiyassa.

[346] Jotiṃ samādahitvā visibbento dve āpattiyo āpajjati Samādahati payoge dukkaṭaṃ samādahite āpatti pācittiyassa.