[287] Evaṃ poṭṭhapādāti . ekañceva nu kho bhante bhagavā saññaggaṃ paññapeti udāhu puthūpi saññagge paññapetīti . Ekaṃpi kho poṭṭhapāda ahaṃ saññaggaṃ paññapemi puthūpi saññagge paññapemīti . yathākathaṃ pana bhante bhagavā ekaṃpi saññaggaṃ paññapeti puthūpi saññagge paññapetīti . yathā yathā kho poṭṭhapāda nirodhaṃ phusati tathā tathā ahaṃ saññaggaṃ paññapemi evaṃ kho ahaṃ poṭṭhapāda ekaṃpi saññaggaṃ paññapemi puthūpi saññagge paññapemīti.
[288] Saññā nu kho bhante paṭhamaṃ uppajjati pacchā ñāṇaṃ udāhu ñāṇaṃ paṭhamaṃ uppajjati pacchā saññā udāhu saññā ca ñāṇaṃ ca apubbaṃ acarimaṃ uppajjantīti . saññā kho poṭṭhapāda paṭhamaṃ uppajjati pacchā ñāṇaṃ saññuppādā ca pana ñāṇuppādo hoti so evaṃ pajānāti idappaccayā kira me ñāṇaṃ udapādīti . Iminā ca kho etaṃ poṭṭhapāda pariyāyena veditabbaṃ yathā saññā paṭhamaṃ uppajjati pacchā ñāṇaṃ saññuppādā ca pana ñāṇuppādo hotīti.
[289] Saññā nu kho bhante purisassa attā udāhu aññā saññā añño attāti . kiṃ pana tvaṃ poṭṭhapāda attānaṃ Paccesīti . oḷārikaṃ kho ahaṃ bhante attānaṃ paccemi rūpiṃ cātummahābhūtikaṃ kavalīkārabhakkhanti . oḷāriko ca hi te poṭṭhapāda attā abhavissa rūpī cātummahābhūtiko kavalīkārabhakkho . evaṃ santaṃ kho te poṭṭhapāda aññā ca saññā abhavissa añño attā . tadimināpetaṃ poṭṭhapāda pariyāyena veditabbaṃ yathā ca aññā saññā bhavissati añño attā . tiṭṭhateva ayaṃ poṭṭhapāda oḷāriko attā rūpī cātummahābhūtiko kavalīkārabhakkho atha imassa purisassa aññā va saññā uppajjati aññā va saññā nirujjhati iminā kho etaṃ poṭṭhapāda pariyāyena veditabbaṃ yathā aññā va saññā bhavissati añño attāti.
[290] Manomayaṃ kho ahaṃ bhante attānaṃ paccemi sabbaṅgapaccaṅgaṃ ahīnindriyanti . manomayo ca hi te poṭṭhapāda attā abhavissa sabbaṅgapaccaṅgī ahīnindriyo . evaṃ santaṃpi kho te poṭṭhapāda aññā ca saññā bhavissati añño attā . tadimināpetaṃ poṭṭhapāda pariyāyena veditabbaṃ yathā aññā va saññā bhavissati añño attā . tiṭṭhateva sāyaṃ ca poṭṭhapāda manomayo attā sabbaṅgapaccaṅgī ahīnindriyo . athakho imassa purisassa aññā va saññā uppajjati aññā saññā nirujjhati . Imināpi kho etaṃ poṭṭhapāda pariyāyena veditabbaṃ yathā aññā ca saññā bhavissati añño attāti.