[291] Arūpiṃ kho ahaṃ bhante attānaṃ paccemi saññāmayanti. Arūpī ca hi te poṭṭhapāda attā bhavissati saññāmayo . evaṃ santaṃpi kho te poṭṭhapāda aññā va saññā bhavissati añño attā . tadimināpetaṃ poṭṭhapāda pariyāyena veditabbaṃ yathā aññā va saññā bhavissati añño attā . tiṭṭhateva sāyaṃ poṭṭhapāda arūpī attā saññāmayo atha imassa purisassa aññā va saññā uppajjati aññā va saññā nirujjhati . imināpi kho etaṃ poṭṭhapāda pariyāyena veditabbaṃ yathā aññā va saññā bhavissati añño attāti.

[292] Sakkā ca panetaṃ bhante mayā ñātuṃ saññā purisassa attāti vā aññā ca saññā añño ca attāti vāti . dujjānaṃ kho etaṃ poṭṭhapāda tayā aññadiṭṭhikena aññakhantikena aññarucikena aññattha āyogena aññatthācariyakena saññā purisassa attāti vā aññā ca saññā añño ca attāti vāti . sace taṃ bhante mayā dujjānaṃ aññadiṭṭhikena aññakhantikena aññarucikena aññattha āyogena aññatthācariyakena saññā purisassa attāti vā aññā ca saññā añño ca attāti vā . kiṃ pana bhante sassato loko idameva saccaṃ moghamaññanti . etaṃpi kho poṭṭhapāda mayā abyākataṃ sassato loko idameva saccaṃ moghamaññanti . kiṃ pana bhante asassato loko idameva saccaṃ Moghamaññanti . etaṃpi kho poṭṭhapāda mayā abyākataṃ asassato loko idameva saccaṃ moghamaññanti . kiṃ pana bhante antavā loko .pe. anantavā loko . taṃ jīvaṃ taṃ sarīraṃ. Aññaṃ jīvaṃ aññaṃ sarīraṃ. Hoti tathāgato parammaraṇā . na hoti tathāgato parammaraṇā . Hoti ca na ca hoti tathāgato parammaraṇā . Neva hoti na na hoti tathāgato parammaraṇā idameva saccaṃ moghamaññanti . etaṃpi kho poṭṭhapāda mayā abyākataṃ neva hoti na na hoti tathāgato parammaraṇā idameva saccaṃ moghamaññanti . kasmā panetaṃ bhante bhagavatā abyākatanti . Na hetaṃ poṭṭhapāda atthasañhitaṃ na dhammasañhitaṃ na ādibrahmacariyakaṃ na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati tasmātaṃ mayā abyākatanti.