[293] Kiṃ pana bhante bhagavatā byākatanti . idaṃ dukkhanti kho poṭṭhapāda mayā byākataṃ ayaṃ dukkhasamudayoti kho poṭṭhapāda mayā byākataṃ ayaṃ dukkhanirodhoti kho poṭṭhapāda mayā byākataṃ ayaṃ dukkhanirodhagāminī paṭipadāti kho poṭṭhapāda mayā byākatanti . Kasmā panetaṃ bhante bhagavatā byākatanti . etaṃ hi poṭṭhapāda atthasañhitaṃ etaṃ dhammasañhitaṃ etaṃ ādibrahmacariyakaṃ nibbidāya virāgāya nirodhāya upasamāya abhiññāya sambodhāya nibbānāya saṃvattati tasmā hetaṃ mayā byākatanti . evametaṃ bhagavā evametaṃ Sugata yassadāni bhante bhagavā kālaṃ maññatīti . athakho bhagavā uṭṭhāyāsanā pakkāmi.

[294] Athakho te paribbājakā acirapakkantassa bhagavato poṭṭhapādaṃ paribbājakaṃ samantato vācāya sannipatodakena sañjambharimakaṃsu evameva panāyaṃ bhavaṃ poṭṭhapādo yaññadeva samaṇo gotamo bhāsati tantadevassa abbhanumodati evametaṃ bhagavā evametaṃ sugatāti na kho pana mayaṃ kiñci samaṇassa gotamassa ekaṃsikaṃ dhammaṃ desitaṃ ājānāma sassato lokoti vā asassato lokoti vā .pe. Neva hoti na na hoti tathāgato parammaraṇāti vāti.

[295] Evaṃ vutte poṭṭhapādo paribbājako te paribbājake etadavoca ahaṃpi kho bho na kiñci samaṇassa gotamassa ekaṃsikaṃ dhammaṃ desitaṃ ājānāmi sassato lokoti vā .pe. neva hoti na na hoti tathāgato parammaraṇāti vā apica samaṇo gotamo bhūtaṃ tacchaṃ tathaṃ paṭipadaṃ paññapeti dhammaṭṭhitataṃ dhammaniyāmataṃ bhūtaṃ kho pana tacchaṃ tathaṃ paṭipadaṃ paññapentassa dhammaṭṭhitataṃ dhammaniyāmataṃ kathaṃ hi nāma mādiso viññū puriso samaṇassa gotamassa subhāsitaṃ subhāsitato na abbhanumodeyyāti.

[296] Athakho dvīhatīhassa accayena citto ca hatthisāriputto poṭṭhapādo ca paribbājako yena bhagavā tenupasaṅkamiṃsu upasaṅkamitvā citto hatthisāriputto bhagavantaṃ abhivādetvā ekamantaṃ nisīdi . Poṭṭhapādo pana paribbājako bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi . ekamantaṃ nisinno kho poṭṭhapādo paribbājako bhagavantaṃ etadavoca tadā maṃ bhante te paribbājakā acirapakkantassa bhagavato samantato vācāya sannipatodakena sañjambharimakaṃsu evameva panāyaṃ bhavaṃ poṭṭhapādo paribbājako yaññadeva samaṇo gotamo bhāsati tantadevassa abbhanumodati evametaṃ bhagavā evametaṃ sugatāti na kho pana mayaṃ kiñci samaṇassa gotamassa ekaṃsikaṃ dhammaṃ desitaṃ ājānāma sassato lokoti vā asassato lokoti vā .pe. neva hoti na na hoti tathāgato paraṃ maraṇāti vāti evaṃ vuttāhaṃ bhante te paribbājake etadavocaṃ ahaṃpi kho bho na kiñci samaṇassa gotamassa ekaṃsikaṃ dhammaṃ desitaṃ ājānāmi sassato lokoti vā .pe. Neva hoti na na hoti tathāgato paraṃ maraṇāti vā apica samaṇo gotamo bhūtaṃ tacchaṃ tathaṃ paṭipadaṃ paññapeti dhammaṭṭhitataṃ dhammaniyāmataṃ bhūtaṃ kho pana tacchaṃ tathaṃ paṭipadaṃ paññapentassa dhammaṭṭhitataṃ dhammaniyāmataṃ kathaṃ hi nāma mādiso viññū puriso samaṇassa gotamassa subhāsitaṃ subhāsitato na anumodeyyāti.