[297] Sabbeheva kho ete poṭṭhapāda paribbājakā andhā acakkhukā tvaññeva nesaṃ eko cakkhumā . ekaṃsikāpi hi kho poṭṭhapāda mayā dhammā desitā paññattā . anekaṃsikāpi hi Kho poṭṭhapāda mayā dhammā desitā paññattā. {297.1} Katame ca poṭṭhapāda mayā anekaṃsikā dhammā desitā paññattā . sassato lokoti kho poṭṭhapāda mayā anekaṃsiko dhammo desito paññatto . asassato lokoti kho poṭṭhapāda mayā anekaṃsiko dhammo desito paññatto . antavā lokoti kho poṭṭhapāda mayā anekaṃsiko dhammo desito paññatto . Anantavā lokoti kho poṭṭhapāda mayā anekaṃsiko dhammo desito paññatto . taṃ jīvaṃ taṃ sarīranti kho poṭṭhapāda mayā anekaṃsiko dhammo desito paññatto . aññaṃ jīvaṃ aññaṃ sarīranti kho poṭṭhapāda mayā anekaṃsiko dhammo desito paññatto . hoti tathāgato paraṃ maraṇāti kho poṭṭhapāda mayā .pe. na hoti tathāgato paraṃ maraṇāti kho poṭṭhapāda mayā .pe. Hoti ca na ca hoti tathāgato paraṃ maraṇāti kho poṭṭhapāda mayā .pe. neva hoti na na hoti tathāgato paraṃ maraṇāti kho poṭṭhapāda mayā anekaṃsiko dhammo desito paññatto. {297.2} Kasmā cete poṭṭhapāda mayā anekaṃsikā dhammā desitā paññattā . na hete poṭṭhapāda atthasañhitā na dhammasañhitā na ādibrahmacariyakā na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattanti tasmā ete mayā anekaṃsikā dhammā desitā paññattā.

[298] Katame ca poṭṭhapāda mayā ekaṃsikā dhammā desitā Paññattā . idaṃ dukkhanti kho poṭṭhapāda mayā ekaṃsiko dhammo desito paññatto . ayaṃ dukkhasamudayoti kho poṭṭhapāda mayā ekaṃsiko dhammo desito paññatto . ayaṃ dukkhanirodhoti kho poṭṭhapāda mayā ekaṃsiko dhammo desito paññatto . ayaṃ dukkhanirodhagāminī paṭipadāti kho poṭṭhapāda mayā ekaṃsiko dhammo desito paññatto. {298.1} Kasmā cete poṭṭhapāda mayā ekaṃsikā dhammā desitā paññattā . ete poṭṭhapāda mayā atthasañhitā ete dhammasañhitā ete ādibrahmacariyakā ete nibbidāya virāgāya nirodhāya upasamāya abhiññāya sambodhāya nibbānāya saṃvattanti tasmā ete mayā ekaṃsikā dhammā desitā paññattā.