[302] Tayo khome poṭṭhapāda attapaṭilābhā oḷāriko attapaṭilābho manomayo attapaṭilābho arūpo attapaṭilābho . katamo ca poṭṭhapāda oḷāriko attapaṭilābho . rūpī cātummahābhūtiko kavalīkārabhakkho ayaṃ oḷāriko attapaṭilābho . katamo manomayo attapaṭilābho . rūpī manomayo sabbaṅgapaccaṅgī ahīnindriyo ayaṃ manomayo attapaṭilābho . katamo arūpo attapaṭilābho . arūpī saññāmayo ayaṃ arūpo attapaṭilābho.

[303] Oḷārikassapi kho ahaṃ poṭṭhapāda attapaṭilābhassa Pahānāya dhammaṃ desemi yathāpaṭipannānaṃ vo saṃkilesikā dhammā pahīyissanti vodāniyā dhammā abhivaḍḍhissanti paññāpāripūriṃ vepullattañca diṭṭhe va dhamme sayaṃ abhiññā sacchikatvā upasampajja viharissathāti . siyā kho pana te poṭṭhapāda evamassa saṃkilesikā dhammā pahīyissanti vodāniyā dhammā abhivaḍḍhissanti paññāpāripūriṃ vepullattañca diṭṭhe va dhamme sayaṃ abhiññā sacchikatvā upasampajja viharissati dukkho ca vihāroti . na kho panetaṃ poṭṭhapāda evaṃ daṭṭhabbaṃ saṃkilesikā ceva dhammā pahīyissanti vodāniyā ca dhammā abhivaḍḍhissanti paññāpāripūriṃ vepullattañca diṭṭhe va dhamme sayaṃ abhiññā sacchikatvā upasampajja viharissati pāmojjañceva bhavissati pīti ca passaddhi ca sati ca sampajaññañca sukho ca vihāro.

[304] Manomayassapi kho ahaṃ poṭṭhapāda attapaṭilābhassa pahānāya dhammaṃ desemi yathāpaṭipannānaṃ vo saṃkilesikā dhammā pahīyissanti vodāniyā dhammā abhivaḍḍhissanti paññāpāripūriṃ vepullattañca diṭṭhe va dhamme sayaṃ abhiññā sacchikatvā upasampajja viharissathāti . siyā kho pana te poṭṭhapāda evamassa saṃkilesikā dhammā pahīyissanti vodāniyā dhammā abhivaḍḍhissanti paññāpāripūriṃ vepullattañca diṭṭhe va dhamme sayaṃ abhiññā sacchikatvā upasampajja viharissati dukkho ca vihāroti . na kho panetaṃ poṭṭhapāda evaṃ daṭṭhabbaṃ saṃkilesikā ceva dhammā pahīyissanti vodāniyā ca dhammā Abhivaḍḍhissanti (peyyālo) pāmojjañceva bhavissati pīti ca passaddhi ca sati ca sampajaññañca sukho ca vihāro.