[319] Kathañca māṇava bhikkhu sīlasampanno hoti idha māṇava bhikkhu pāṇātipātaṃ pahāya pāṇātipātā paṭivirato hoti nihitadaṇḍo nihitasattho lajjī dayāpanno sabbapāṇabhūtahitānukampī viharati . yaṃpi māṇava bhikkhu pāṇātipātaṃ pahāya pāṇātipātā paṭivirato hoti nihitadaṇḍo nihitasattho lajjī dayāpanno sabbapāṇabhūtahitānukampī Viharati idaṃpissa hoti sīlasmiṃ (tato paraṃ sabbaṃ vitthāretabbaṃ) .pe.
[320] Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpāya tiracchānavijjāya micchājīvena jīvikaṃ kappenti . seyyathīdaṃ . santikammaṃ paṇidhikammaṃ bhūmikammaṃ bhūrikammaṃ vassakammaṃ vossakammaṃ vatthukammaṃ vatthuparikaraṇaṃ ācamanaṃ nhāpanaṃ juhanaṃ vamanaṃ virecanaṃ uddhavirecanaṃ adhovirecanaṃ sīsavirecanaṃ kaṇṇatelaṃ nettappānaṃ natthukammaṃ añjanaṃ paccañjanaṃ sālākiyaṃ sallakattiyaṃ dārakatikicchaṃ mūlabhesajjānaṃ anuppadānaṃ osadhīnaṃ paṭimokkho iti vā . iti evarūpāya tiracchānavijjāya micchājīvā paṭivirato hoti. Yaṃpi māṇava bhikkhu yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpāya tiracchānavijjāya micchājīvena jīvikaṃ kappenti . seyyathīdaṃ . santikammaṃ paṇidhikammaṃ .pe. Osadhīnaṃ paṭimokkho iti vā. Iti evarūpāya tiracchānavijjāya micchājīvā paṭivirato hoti idampissa hoti sīlasmiṃ. {320.1} Sa kho so māṇava bhikkhu evaṃ sīlasampanno na kutoci bhayaṃ samanupassati yadidaṃ sīlasaṃvarato . seyyathāpi māṇava rājā khattiyo muddhāvasitto nihatapaccāmitto na kutopi bhayaṃ samanupassati yadidaṃ paccatthikato evameva kho māṇava bhikkhu evaṃ sīlasampanno na kutopi bhayaṃ samanupassati yadidaṃ sīlasaṃvarato . so iminā ariyena sīlakkhandhena samannāgato ajjhattaṃ Anavajjasukhaṃ paṭisaṃvedeti . evaṃ kho māṇava bhikkhu sīlasampanno hoti . ayaṃ kho so māṇava ariyo sīlakkhandho yassa so bhagavā vaṇṇavādī ahosi ettha ca imaṃ janataṃ samādapesi nivesesi patiṭṭhāpesi atthi cevettha uttariṃ karaṇīyanti. {320.2} Acchariyaṃ bho ānanda abbhūtaṃ bho ānanda so cāyaṃ bho ānanda ariyo sīlakkhandho paripuṇṇo no aparipuṇṇo evaṃ paripuṇṇañcāhaṃ bho ānanda ariyaṃ sīlakkhandhaṃ ito bahiddhā aññesu samaṇabrāhmaṇesu na samanupassāmi . evaṃ paripuṇṇañca bho ānanda ariyaṃ sīlakkhandhaṃ ito bahiddhā aññe samaṇabrāhmaṇā attani samanupasseyyuṃ te tāvatakeneva attamanā assu alamettāvatā katamettāvatā anuppatto no sāmaññattho natthi no kiñci uttariṃ karaṇīyanti . atha ca pana bhavaṃ ānando evamāha atthi cevettha uttariṃ karaṇīyanti.