[340] Katamañca kevaṭṭa ādesanāpāṭihāriyaṃ . idha kevaṭṭa bhikkhu parasattānaṃ parapuggalānaṃ cittampi ādisati cetasikampi ādisati vitakkitampi ādisati vicāritampi ādisati evampi te mano itthampi te mano itipi te cittanti. {340.1} Tamenaṃ aññataro saddho pasanno passati taṃ bhikkhuṃ parasattānaṃ parapuggalānaṃ cittampi ādisantaṃ cetasikampi ādisantaṃ vitakkitampi ādisantaṃ vicāritampi ādisantaṃ evampi te mano itthampi te mano itipi te cittanti . Tamenaṃ so saddho pasanno aññatarassa assaddhassa appasannassa āroceti acchariyaṃ vata bho abbhūtaṃ vata bho samaṇassa mahiddhikatā mahānubhāvatā amāhaṃ bhikkhuṃ addasaṃ parasattānaṃ parapuggalānaṃ cittampi ādisantaṃ cetasikampi ādisantaṃ vitakkitampi ādisantaṃ vicāritampi ādisantaṃ evaṃpi te mano itthampi te mano itipi te cittanti . tamenaṃ So assaddho appasanno taṃ saddhaṃ pasannaṃ evaṃ vadeyya atthi kho bho maṇikā nāma vijjā tāya so bhikkhu parasattānaṃ parapuggalānaṃ cittampi ādisati cetasikampi ādisati vitakkitampi ādisati vicāritampi ādisati evampi te mano itthampi te mano itipi te cittanti. Taṃ kiṃ maññasi kevaṭṭa api nu so assaddho appasanno taṃ saddhaṃ pasannaṃ evaṃ vadeyyāti . vadeyya bhanteti . imaṃ kho ahaṃ kevaṭṭa ādesanāpāṭihāriye ādīnavaṃ sampassamāno ādesanāpāṭihāriyena aṭṭiyāmi harāyāmi jigucchāmi.

[341] Katamañca kevaṭṭa anusāsanipāṭihāriyaṃ . idha kevaṭṭa bhikkhu evamanusāsati evaṃ vitakketha mā evaṃ vitakkayittha evaṃ manasikarotha mā evaṃ manasikarotha idaṃ pajahatha idaṃ upasampajja viharathāti. Idaṃ vuccati kevaṭṭa anusāsanipāṭihāriyaṃ.

[342] Puna caparaṃ kevaṭṭa idha tathāgato loke uppajjati arahaṃ sammāsambuddho .pe. (yathā sāmaññaphale evaṃ vitthāretabbaṃ) .pe. idaṃpi vuccati kevaṭṭa anusāsanipāṭihāriyaṃ . dutiyaṃ jhānaṃ . Tatiyaṃ jhānaṃ . catutthaṃ jhānaṃ upasampajja viharati . idaṃ vuccati kevaṭṭa anusāsanipāṭihāriyaṃ .pe. ñāṇadassanāya cittaṃ abhinīharati abhininnāmeti . idaṃ vuccati kevaṭṭa anusāsanipāṭihāriyaṃ . .pe. Nāparaṃ itthattāyāti pajānāti idaṃ vuccati anusāsanipāṭihāriyaṃ . Imāni kho kevaṭṭa tīṇi pāṭihāriyāni mayā sayaṃ Abhiññā sacchikatvā paveditāni.