[344] Athakho so kevaṭṭa bhikkhu yena vasavatti devaputto tenupasaṅkami upasaṅkamitvā vasavattiṃ devaputtaṃ etadavoca kattha nu kho āvuso ime cattāro mahābhūtā aparisesā nirujjhanti seyyathīdaṃ paṭhavīdhātu āpodhātu tejodhātu vāyodhātūti . evaṃ vutte kevaṭṭa vasavatti devaputto taṃ bhikkhuṃ etadavoca ahaṃpi kho bhikkhu na jānāmi yatthime cattāro mahābhūtā aparisā nirujjhanti seyyathīdaṃ paṭhavīdhātu āpodhātu tejodhātu vāyodhātūti atthi kho bhikkhu brahmakāyikā nāma devā amhehi abhikkantatarā ca paṇītatarā ca te kho evaṃ jāneyyuṃ yatthime cattāro .pe. vāyodhātūti . athakho kevaṭṭa bhikkhu tathārūpaṃ samādhiṃ samāpajji yathā samāhite citte brahmayāniyo maggo pāturahosi.
[345] Athakho so kevaṭṭa bhikkhu yena brahmakāyikā devā tenupasaṅkami upasaṅkamitvā brahmakāyike deve etadavoca kattha nu kho āvuso ime cattāro .pe. vāyodhātūti . evaṃ vutte kevaṭṭa brahmakāyikā devā taṃ bhikkhuṃ etadavocuṃ mayaṃpi kho bhikkhu Na jānāma yatthime .pe. vāyodhātūti atthi kho bhikkhu brahmā mahābrahmā abhibhū anabhibhūto aññadatthudaso vasavatti issaro kattā nimmitā seṭṭho sajjitā vasī pitā bhūtabhabyānaṃ amhehi abhikkantataro ca paṇītataro ca so kho evaṃ jāneyya yatthime cattāro mahābhūtā aparisesā nirujjhanti seyyathīdaṃ paṭhavīdhātu āpodhātu tejodhātu vāyodhātūti . kahaṃ panāvuso etarahi so mahābrahmāti . mayaṃpi kho bhikkhu na jānāma yattha vā brahmā yena vā brahmā apica bhikkhu yathā nimittā dissanti āloko sañjāyati obhāso pātubhavati brahmā pātubhavissati brahmuno hetaṃ pubbanimittaṃ pātubhāvāya yadidaṃ āloko sañjāyati obhāso pātubhavatīti. Athakho so kevaṭṭa mahābrahmā nacirasseva pāturahosi.
[346] Athakho so kevaṭṭa bhikkhu yena mahābrahmā tenupasaṅkami upasaṅkamitvā taṃ mahābrahmānaṃ etadavoca kattha nu kho āvuso ime cattāro mahābhūtā aparisesā nirujjhanti seyyathīdaṃ paṭhavīdhātu āpodhātu tejodhātu vāyodhātūti . evaṃ vutte kevaṭṭa so mahābrahmā taṃ bhikkhuṃ etadavoca ahamasmi bhikkhu brahmā mahābrahmā abhibhū anabhibhūto aññadatthudaso vasavatti issaro kattā nimmitā seṭṭho sajjitā vasī pitā bhūtabhabyānanti . dutiyampi kho kevaṭṭa so bhikkhu taṃ mahābrahmānaṃ etadavoca na kho ahaṃ taṃ āvuso evaṃ pucchāmi tvamasi brahmā mahābrahmā abhibhū anabhibhūto aññadatthudaso Vasavatti issaro kattā nimmitā sajjitā vasī pitā bhūtabhabyānaṃ evañca kho ahantaṃ āvuso evaṃ pucchāmi kattha nu kho āvuso ime cattāro mahābhūtā aparisesā nirujjhanti seyyathīdaṃ paṭhavīdhātu āpodhātu tejodhātu vāyodhātūti . dutiyampi kho kevaṭṭa so mahābrahmā taṃ bhikkhuṃ etadavoca ahamasmi bhikkhu brahmā mahābrahmā abhibhū anabhibhūto aññadatthudaso vasavatti issaro kattā nimmitā seṭṭho sajjitā vasī pitā bhūtabhabyānanti . tatiyampi kho kevaṭṭa so bhikkhu taṃ mahābrahmānaṃ etadavoca na kho ahantaṃ āvuso evaṃ pucchāmi tvamasi brahmā mahābrahmā abhibhū anabhibhūto aññadatthudaso vasavatti issaro kattā nimmitā seṭṭho sajjitā vasī pitā bhūtabhabyānaṃ evañca kho ahantaṃ āvuso evaṃ pucchāmi kattha nu kho āvuso ime cattāro mahābhūtā aparisesā nirujjhanti seyyathīdaṃ paṭhavīdhātu āpodhātu tejodhātu vāyodhātūti.