[371] Taṃ kiṃ maññasi vāseṭṭha nanu evaṃ sante tevijjānaṃ brāhmaṇānaṃ appāṭihirikataṃ bhāsitaṃ sampajjatīti . addhā kho bho gotama evaṃ sante tevijjānaṃ brāhmaṇānaṃ appāṭihirikataṃ bhāsitaṃ sampajjatīti . sādhu vāseṭṭha tevijjā brāhmaṇā yaṃ na jānanti yaṃ na passanti tassa sahabyatāya maggaṃ desissanti ayameva ujumaggo ayamañjasāyano niyyāniko niyyāti takkarassa brahmasahabyatāyāti netaṃ ṭhānaṃ vijjati . seyyathāpi vāseṭṭha Andhaveṇīparaṃparasaṃsattā purimopi na passati majjhimopi na passati pacchimopi na passati evameva kho vāseṭṭha andhaveṇūpamaṃ maññe tevijjānaṃ brāhmaṇānaṃ bhāsitaṃ purimopi na passati majjhimopi na passati pacchimopi na passati tesamidaṃ tevijjānaṃ brāhmaṇānaṃ bhāsitaṃ hassakaṃyeva sampajjati nāmakaṃyeva sampajjati rittakaṃyeva sampajjati tucchakaṃyeva sampajjati . taṃ kiṃ maññasi vāseṭṭha passanti tevijjā brāhmaṇā candimasuriye aññe vāpi bahū janā yato ca candimasuriyā uggacchanti yattha ca ogacchanti āyācanti thomayanti pañjalikā namassamānā anuparivattantīti . evaṃ bho gotama passanti tevijjā brāhmaṇā candimasuriye aññe vāpi bahū janā yato ca candimasuriyā uggacchanti yattha ca ogacchanti āyācanti thomayanti pañjalikā namassamānā anuparivattantīti.

[372] Taṃ kiṃ maññasi vāseṭṭha yaṃ passanti tevijjā brāhmaṇā candimasuriye aññe vāpi bahū janā yato ca candimasuriyā uggacchanti yattha ca ogacchanti āyācanti thomayanti pañjalikā namassamānā anuparivattantīti tesampi pahonti tevijjā brāhmaṇā candimasuriyānaṃ sahabyatāya maggaṃ desetuṃ ayameva ujumaggo ayamañjasāyano niyyāniko niyyāti takkarassa candimasuriyānaṃ sahabyatāyāti . no hidaṃ bho gotama. Iti kira vāseṭṭha yaṃ passanti tevijjā brāhmaṇā candimasuriye aññe vāpi bahū janā yato ca candimasuriyā uggacchanti Yattha ca ogacchanti āyācanti thomayanti pañjalikā namassamānā anuparivattanti tesaṃpi na pahonti candimasuriyānaṃ sahabyatāya maggaṃ desetuṃ ayameva ujumaggo ayamañjasāyano niyyāniko niyyāti takkarassa candimasuriyānaṃ sahabyatāyāti kiṃ pana na kira tevijjehi brāhmaṇehi brahmā sakkhi diṭṭho napi kira tevijjānaṃ brāhmaṇānaṃ ācariyehi brahmā sakkhi diṭṭho napi kira tevijjānaṃ brāhmaṇānaṃ ācariyapācariyehi brahmā sakkhi diṭṭho napi kira tevijjānaṃ brāhmaṇānaṃ yāva sattamācariyamahayugā brahmā sakkhi diṭṭho yepi kira tevijjānaṃ brāhmaṇānaṃ pubbakā isayo mantānaṃ kattāro mantānaṃ pavattāro yesamidaṃ etarahi tevijjā brāhmaṇā porāṇaṃ mantapadaṃ gītaṃ pavuttaṃ samīhitaṃ tadanugāyanti tadanubhāsanti bhāsitamanubhāsanti vācitamanuvācenti seyyathīdaṃ aṭṭhako vāmako vāmadevo vessāmitto yamataggī aṅgiraso bhāradvājo vāseṭṭho kassapo bhagu tepi naṃ evamāhaṃsu mayametaṃ jānāma mayametaṃ passāma yattha vā brahmā yena vā brahmā yahiṃ vā brahmāti . te va tevijjā brāhmaṇā evamāhaṃsu yaṃ na jānāma yaṃ na passāma tassa sahabyatāya maggaṃ desema ayameva ujumaggo ayamañjasāyano niyyāniko niyyāti takkarassa brahmasahabyatāyāti.