[378] Seyyathāpi vāseṭṭha ayaṃ aciravatī nadī pūrā udakassa samatittikā kākapeyyā athakho puriso āgaccheyya pāratthiko pāragavesī pāragāmī pāraṃ taritukāmo so orime tīre sasīsaṃ pārupitvā nipajjeyya . taṃ kiṃ maññasi vāseṭṭha api nu kho so puriso aciravatiyā nadiyā orimā tīrā pārimantīraṃ gaccheyyāti. No hidaṃ bho gotama . evameva kho vāseṭṭha pañcime nīvaraṇā ariyassa vinaye āvaraṇātipi vuccanti nīvaraṇātipi vuccanti onāhanātipi vuccanti pariyohanātipi vuccanti katame pañca kāmachandanīvaraṇaṃ byāpādanīvaraṇaṃ thīnamiddhanīvaraṇaṃ uddhaccakukkuccanīvaraṇaṃ vicikicchānīvaraṇaṃ ime kho vāseṭṭha pañca nīvaraṇā ariyassa vinaye āvaraṇātipi vuccanti nīvaraṇātipi vuccanti onāhanātipi vuccanti pariyohanātipi vuccanti.

[379] Imehi kho vāseṭṭha pañcahi nīvaraṇehi tevijjā brāhmaṇā āvuṭā nivuṭā ophutā pariyonaddhā . te ca vāseṭṭha tevijjā brāhmaṇā ye dhammā brāhmaṇakaraṇā te dhamme pahāya vattamānā ye dhammā abrāhmaṇakaraṇā te dhamme samādāya vattamānā pañcahi nīvaraṇehi āvuṭā nivuṭā ophutā pariyonaddhā te kāyassa bhedā parammaraṇā brahmasahabyūpagā bhavissantīti netaṃ ṭhānaṃ vijjati.

[380] Taṃ kiṃ maññasi vāseṭṭha kinti te sutaṃ brāhmaṇānaṃ vuḍḍhānaṃ mahallakānaṃ ācariyapācariyānaṃ bhāsamānānaṃ sapariggaho vā brahmā apariggaho vāti . apariggaho bho gotama. Saveracitto vā averacitto vāti . averacitto bho gotama . sabyāpajjhacitto vā abyāpajjhacitto vāti . abyāpajjhacitto bho gotama . Saṃkiliṭṭhacitto vā asaṃkiliṭṭhacitto vāti . asaṃkiliṭṭhacitto bho gotama. Vasavatti vā avasavatti vāti. Vasavatti bho gotama. {380.1} Taṃ kiṃ maññasi vāseṭṭha sapariggahā vā tevijjā brāhmaṇā apariggahā vāti . sapariggahā bho gotama. Saveracittā vā averacittā vāti . saveracittā bho gotama. Sabyāpajjhacittā vā abyāpajjhacittā vāti . sabyāpajjhacittā bho gotama. Saṃkiliṭṭhacittā vā asaṃkiliṭṭhacittā vāti . saṃkiliṭṭhacittā bho gotama . vasavattī vā avasavattī vāti. Avasavattī bho gotama.