[95] Ekamidāhaṃ bhante samayaṃ yena makkhali gosālo tenupasaṅkamiṃ upasaṅkamitvā makkhalinā gosālena saddhiṃ sammodiṃ sammodanīyaṃ kathaṃ sārāṇīyaṃ vītisāretvā ekamantaṃ nisīdiṃ ekamantaṃ nisinno kho ahaṃ bhante makkhaliṃ gosālaṃ etadavocaṃ yathā nu kho imāni bho gosāla puthusippāyatanāni .pe. sakkā nu kho bho gosāla evameva diṭṭhe va dhamme sandiṭṭhikaṃ sāmaññaphalaṃ paññapetunti {95.1} evaṃ vutte bhante makkhali gosālo maṃ etadavoca natthi mahārāja hetu natthi paccayo sattānaṃ saṃkilesāya ahetū appaccayā sattā saṃkilissanti natthi hetu natthi paccayo sattānaṃ visuddhiyā ahetū appaccayā sattā visujjhanti natthi attakāre natthi parakāre natthi purisakāre natthi balaṃ natthi viriyaṃ natthi purisathāmo natthi Purisaparakkamo sabbe sattā sabbe pāṇā sabbe bhūtā sabbe jīvā avasā abalā aviriyā niyatisaṅgatibhāvapariṇatā chasvevābhijātīsu sukhañca dukkhañca paṭisaṃvedenti cuddasa kho panimāni mahārāja yonipamukhasatasahassāni saṭṭhī ca satāni cha satāni pañca ca kammuno satāni pañca ca kammāni tīṇi ca kammāni kamme ca upaḍḍhakamme ca dvaṭṭhipaṭipadā dvaṭṭhantarakappā chaḷābhijātiyo aṭṭhapurisabhūmiyo ekūnapaññāsa ājīvakasate ekūnapaññāsa paribbājakasate ekūnapaññāsa nāgavāsasate vīse indriyasate tiṃse nirayasate chattiṃsarajodhātuyo sattasaññīgabbhā sattaasaññīgabbhā sattanigaṇṭhigabbhā sattadevā sattamanussā sattapisācā sattasarā sattapavuṭā sattapapātā sattapapātasatāni sattasupinā sattasupinasatāni cullāsītimahākappino satasahassāni yāni bāle ca paṇḍite ca sandhāvitvā saṃsaritvā dukkhassantaṃ karissanti tattha natthi imināhaṃ sīlena vā vattena vā tapena vā brahmacariyena vā aparipakkaṃ vā kammaṃ paripācessāmi paripakkaṃ vā kammaṃ phussā phussā byantikarissāmīti hevaṃ natthi doṇamite sukhadukkhe pariyantakate Saṃsāre natthi hānavaḍḍhane natthi ukkaṃsāvakkaṃse seyyathāpi nāma suttagule khitte nibbeṭhiyamānameva paleti evameva bāle ca paṇḍite ca sandhāvitvā saṃsaritvā dukkhassantaṃ karissantīti {95.2} itthaṃ kho me bhante makkhali gosālo sandiṭṭhikaṃ sāmaññaphalaṃ puṭṭho samāno saṃsārasuddhiṃ byākāsi seyyathāpi bhante ambaṃ vā puṭṭho labujaṃ byākareyya labujaṃ vā puṭṭho ambaṃ byākareyya evameva kho me bhante makkhali gosālo sandiṭṭhikaṃ sāmaññaphalaṃ puṭṭho samāno saṃsārasuddhiṃ byākāsi tassa mayhaṃ bhante etadahosi kathaṃ hi nāma mādiso samaṇaṃ vā brāhmaṇaṃ vā vijite vasantaṃ apasādetabbaṃ maññeyyāti so kho ahaṃ bhante makkhalissa gosālassa bhāsitaṃ neva abhinandiṃ nappaṭikkosiṃ anabhinanditvā appaṭikkositvā anattamano anattamanavācaṃ anicchāretvā tameva vācaṃ anuggaṇhanto anikkujjento uṭṭhāyāsanā pakkāmiṃ.