[100] Sohaṃ bhante bhagavantampi pucchāmi yathā nu kho imāni bhante puthusippāyatanāni seyyathīdaṃ hatthārohā assārohā rathikā dhanuggahā celakā calakā piṇḍadāyikā uggā rājaputtā pakkhandino mahānāgā surā cammayodhino dāsakaputtā āḷārikā kappakā nhāpakā sūdā mālākārā rajakā pesakārā nalakārā kumbhakārā gaṇakā muddikā yāni vā panaññānipi evaṃgatāni puthusippāyatanāni te diṭṭhe va dhamme sandiṭṭhikaṃ sippaphalaṃ upajīvanti te tena attānaṃ sukhenti piṇenti mātāpitaro sukhenti piṇenti puttadāraṃ sukhenti piṇenti mittāmacce sukhenti piṇenti samaṇabrāhmaṇesu uddhaggikaṃ dakkhiṇaṃ patiṭṭhāpenti sovaggikaṃ sukhavipākaṃ saggasaṃvattanikaṃ sakkā nu kho bhante evameva diṭṭhe va dhamme sandiṭṭhikaṃ sāmaññaphalaṃ paññapetunti. {100.1} Sakkā mahārāja tenahi mahārāja taññevettha paṭipucchissāmi yathā te khameyya tathā taṃ byākareyyāsi taṃ kiṃ maññasi mahārāja idha te assa puriso dāso kammakaro pubbuṭṭhāyī pacchānipātī kiṃkārapaṭissāvī manāpacārī piyavādī mukhullokiko tassa evamassa acchariyaṃ vata bho abbhūtaṃ vata bho puññānaṃ gati puññānaṃ vipāko ayaṃ hi rājā māgadho ajātasattu vedehiputto Manusso ahaṃpi manusso ayaṃ hi rājā māgadho ajātasattu vedehiputto pañcahi kāmaguṇehi samappito samaṅgībhūto paricāreti devo maññe ahaṃ panamhissa dāso kammakaro pubbuṭṭhāyī pacchānipātī kiṃkārapaṭissāvī manāpacārī piyavādī mukhullokiko so vatassāhaṃ puññāni kareyyaṃ yannūnāhaṃ kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajeyyanti . so aparena samayena kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajeyya . so evaṃ pabbajito samāno kāyena saṃvuto vihareyya vācāya saṃvuto vihareyya manasā saṃvuto vihareyya ghāsacchādanaparamatāya santuṭṭho abhirato paviveke. {100.2} Tañceke purisā evamāroceyyuṃ yagghe deva jāneyyāsi yo te so puriso dāso kammakaro pubbuṭṭhāyī pacchānipātī kiṃkārapaṭissāvī manāpacārī piyavādī mukhullokiko so deva kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajito so evaṃ pabbajito samāno kāyena saṃvuto viharati vācāya saṃvuto viharati manasā saṃvuto viharati ghāsacchādana- paramatāya santuṭṭho abhirato paviveketi. Apinu tvaṃ evaṃ vadeyyāsi etu me bho so puriso punadeva hotu dāso kammakaro pubbuṭṭhāyī pacchānipātī kiṃkārapaṭissāvī manāpacārī piyavādī mukhullokikoti . nohetaṃ bhante Athakho naṃ mayameva abhivādeyyāmapi paccuṭṭheyyāmapi āsanenapi nimanteyyāma abhinimanteyyāmapi naṃ cīvarapiṇḍapātasenāsanagilānapaccaya- bhesajjaparikkhārehi dhammikaṃpissa rakkhāvaraṇaguttiṃ saṃvidaheyyāmāti . Taṃ kiṃ maññasi mahārāja yadi evaṃ sante hoti vā sandiṭṭhikaṃ sāmaññaphalaṃ no vāti . Addhā kho bhante evaṃ sante hoti sandiṭṭhikaṃ sāmaññaphalanti. Idaṃ kho te mahārāja mayā paṭhamaṃ diṭṭhe va dhamme sandiṭṭhikaṃ sāmaññaphalaṃ paññattanti.