[101] Sakkā pana bhante aññaṃpi evameva diṭṭhe va dhamme sandiṭṭhikaṃ sāmaññaphalaṃ paññapetunti . sakkā mahārāja tenahi mahārāja taññevettha paṭipucchissāmi yathā te khameyya tathā naṃ byākareyyāsi . taṃ kiṃ maññasi mahārāja idha te assa puriso kassako gahapatiko kārakārako rāsivaḍḍhako . tassa evamassa acchariyaṃ vata bho abbhūtaṃ vata bho puññānaṃ gati puññānaṃ vipāko ayaṃ hi rājā māgadho ajātasattu vedehiputto manusso ahampi manusso ayaṃ hi rājā māgadho ajātasattu vedehiputto pañcahi kāmaguṇehi samappito samaṅgībhūto paricāreti devo maññe ahaṃ panamhissa kassako gahapatiko kārakārako rāsivaḍḍhako so vatassāhaṃ puññāni kareyyaṃ yannūnāhaṃ kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajeyyanti. {101.1} So aparena samayena appaṃ vā bhogakkhandhaṃ pahāya Mahantaṃ vā bhogakkhandhaṃ pahāya appaṃ vā ñātiparivaṭṭaṃ pahāya mahantaṃ vā ñātiparivaṭṭaṃ pahāya kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajeyya . so evaṃ pabbajito samāno kāyena saṃvuto vihareyya vācāya saṃvuto vihareyya manasā saṃvuto vihareyya ghāsacchādanaparamatāya santuṭṭho abhirato paviveke . tañceke purisā evamāroceyyuṃ yagghe deva jāneyyāsi yo te so puriso kassako gahapatiko kārakārako rāsivaḍḍhako so deva kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajito so evaṃ pabbajito samāno kāyena saṃvuto viharati vācāya saṃvuto viharati manasā saṃvuto viharati ghāsacchādanaparamatāya santuṭṭho abhirato paviveketi . Apinu tvaṃ evaṃ vadeyyāsi etu me bho so puriso punadeva hotu kassako gahapatiko kārakārako rāsivaḍḍhakoti. {101.2} No hetaṃ bhante athakho naṃ mayameva abhivādeyyāmapi paccuṭṭheyyāmapi āsanenapi nimanteyyāma abhinimanteyyāmapi naṃ cīvarapiṇḍapātasenāsanagilānapaccayabhesajjaparikkhārehi dhammikaṃpissa rakkhāvaraṇaguttiṃ saṃvidaheyyāmāti . taṃ kiṃ maññasi mahārāja yadi evaṃ sante hoti vā sandiṭṭhikaṃ sāmaññaphalaṃ no vāti . Addhā kho bhante evaṃ sante hoti sandiṭṭhikaṃ sāmaññaphalanti . idaṃ kho te mahārāja mayā dutiyaṃ diṭṭhe va dhamme sandiṭṭhikaṃ sāmaññaphalaṃ paññattanti.