[144] Tena kho pana samayena sambahulā bhikkhū abbhokāse caṅkamanti . athakho ambaṭṭho māṇavo yena te bhikkhū tenupasaṅkami upasaṅkamitvā te bhikkhū etadavoca kahaṃ nu kho bho etarahi so bhavaṃ gotamo viharati taṃ hi mayaṃ bhavantaṃ gotamaṃ dassanāya idhūpasaṅkantāti. Athakho tesaṃ bhikkhūnaṃ etadahosi ayaṃ kho ambaṭṭho māṇavo abhiññātakolañño ceva abhiññātassa ca brāhmaṇassa pokkharasātissa antevāsī agaru kho pana bhagavato evarūpehi kulaputtehi saddhiṃ kathāsallāpo hotīti . te ambaṭṭhaṃ māṇavaṃ etadavocuṃ eso ambaṭṭha vihāro saṃvutadvāro tena appasaddo upasaṅkamitvā ataramāno āḷindaṃ pavisitvā ukkāsitvā aggaḷaṃ ākoṭehi vivarissati te bhagavā dvāranti . athakho ambaṭṭho māṇavo yena so vihāro saṃvutadvāro tena appasaddo upasaṅkamitvā ataramāno āḷindaṃ pavisitvā ukkāsitvā aggaḷaṃ ākoṭesi . vivari bhagavā dvāraṃ . pāvisi ambaṭṭho māṇavo . māṇavakāpi kho pavisitvā bhagavatā saddhiṃ sammodiṃsu sammodanīyaṃ kathaṃ sārāṇīyaṃ vītisāretvā ekamantaṃ nisīdiṃsu.
[145] Ambaṭṭho pana māṇavo caṅkamantopi nisinnena bhagavatā Kañci kañci kathaṃ sārāṇīyaṃ vītisāreti ṭhitopi nisinnena bhagavatā kañci kañci kathaṃ sārāṇīyaṃ vītisāreti . athakho bhagavā ambaṭṭhaṃ māṇavaṃ etadavoca evaṃ nu te ambaṭṭha brāhmaṇehi vuḍḍhehi mahallakehi ācariyapācariyehi saddhiṃ kathāsallāpo hoti yathayidaṃ caraṃ tiṭṭhaṃ nisinnena mayā kañci kañci kathaṃ sārāṇīyaṃ vītisāresīti. {145.1} No hidaṃ bho gotama gacchanto vā hi bho gotama gacchantena brāhmaṇo brāhmaṇena saddhiṃ sallapitumarahati ṭhito vā hi bho gotama ṭhitena brāhmaṇo brāhmaṇena saddhiṃ sallapitumarahati nisinno vā hi bho gotama nisinnena brāhmaṇo brāhmaṇena saddhiṃ sallapitumarahati sayāno vā hi bho gotama sayānena brāhmaṇo brāhmaṇena saddhiṃ sallapitumarahati ye ca kho bho gotama muṇḍakā samaṇakā ibbhā kaṇhā bandhupādapaccā tehipi me saddhiṃ evaṃ kathāsallāpo hoti yathariva bhotā gotamenāti . atthikavato kho pana te ambaṭṭha idhāgamanaṃ ahosi yāyeva kho panatthāya āgaccheyyātha tameva atthaṃ sādhukaṃ manasikareyyātha avusitavāyeva kho pana ambaṭṭho māṇavo vusitamānī kimaññatra avusitattāti. {145.2} Athakho ambaṭṭho māṇavo bhagavatā avusitavādena vuccamāno kupito anattamano bhagavantaṃyeva khuṃsento bhagavantaṃyeva vambhento bhagavantaṃyeva vadamāno samaṇo ca me bho gotamo pāpito bhavissatīti bhagavantaṃ etadavoca caṇḍā bho gotama sakyajāti pharusā bho gotama sakyajāti lahusā Bho gotama sakyajāti rabhasā bho gotama sakyajāti ibbhā santā ibbhā samānā na brāhmaṇe sakkaronti na brāhmaṇe garukaronti na brāhmaṇe mānenti na brāhmaṇe pūjenti na brāhmaṇe apacāyanti tayidaṃ bho gotama na channaṃ tayidaṃ nappaṭirūpaṃ yadime sakyā ibbhā santā ibbhā samānā na brāhmaṇe sakkaronti na brāhmaṇe garukaronti na brāhmaṇe mānenti na brāhmaṇe pūjenti na brāhmaṇe apacāyantīti . itiha ambaṭṭho māṇavo imaṃ paṭhamaṃ sakyesu ibbhāvādaṃ nipātesi.