[146] Kiṃ pana te ambaṭṭha sakyā aparaddhunti . ekamidāhaṃ bho gotama samayaṃ ācariyassa brāhmaṇassa pokkharasātissa kenacideva karaṇīyena kapilavatthuṃ agamāsiṃ yena sakyānaṃ saṇṭhāgāraṃ tenupasaṅkamiṃ tena kho pana samayena sambahulā sakyā ceva sakyakumārā ca saṇṭhāgāre uccesu āsanesu nisinnā honti aññamaññaṃ aṅgulipatodakehi sañjagghantā saṅkīḷantā aññadatthuṃ mamaññeva maññe anujagghantā na maṃ koci āsanenapi nimantesi tayidaṃ bho gotama na channaṃ tayidaṃ nappaṭirūpaṃ yadime sakyā ibbhā santā ibbhā samānā na brāhmaṇe sakkaronti na brāhmaṇe garukaronti na brāhmaṇe mānenti na brāhmaṇe pūjenti na brāhmaṇe apacāyantīti . itiha ambaṭṭho māṇavo idaṃ dutiyaṃ sakyesu ibbhāvādaṃ nipātesi.

[147] Laṭukikāpi kho ambaṭṭha sakuṇikā sake kulāvake kāmalāpinī hoti sakaṃ kho panetaṃ ambaṭṭha sakyānaṃ yadidaṃ kapilavatthuṃ na arahatāyasmā ambaṭṭho imāya appamattāya abhisajjitunti cattārome bho gotama vaṇṇā khattiyā brāhmaṇā vessā suddā . imesaṃ hi bho gotama catunnaṃ vaṇṇānaṃ tayo vaṇṇā khattiyā ca vessā ca suddā ca aññadatthuṃ brāhmaṇasseva paricārakā sampajjanti tayidaṃ bho gotama na channaṃ tayidaṃ nappaṭirūpaṃ yadime sakyā ibbhā santā ibbhā samānā na brāhmaṇe sakkaronti na brāhmaṇe garukaronti na brāhmaṇe mānenti na brāhmaṇe pūjenti na brāhmaṇe apacāyantīti . itiha ambaṭṭho māṇavo idaṃ tatiyaṃ sakyesu ibbhāvādaṃ nipātesi.

[148] Athakho bhagavato etadahosi atibāḷhaṃ kho ayaṃ ambaṭṭho māṇavo sakyesu ibbhāvādena nimmadeti yannūnāhaṃ gottaṃ puccheyyanti. Athakho bhagavā ambaṭṭhaṃ māṇavaṃ etadavoca kathaṃgottosi ambaṭṭhāti . Kaṇhāyanohamasmi bho gotamāti . porāṇaṃ kho pana te ambaṭṭha mātāpettikaṃ nāma gottaṃ anussarato ayyaputtā sakyā bhavanti dāsiputto tvamasi sakyānaṃ sakyā kho pana ambaṭṭha rājānaṃ ukkākaṃ pitāmahaṃ dahanti .