[151] Athakho bhagavā ambaṭṭhaṃ māṇavaṃ etadavoca ayaṃ kho pana te ambaṭṭha sahadhammiko pañho āgacchati akāmāpi byākātabbo sace tvaṃ na byākarissasi aññena vā aññaṃ paticarissasi tuṇhī vā bhavissasi pakkamissasi vā ettheva te sattadhā muddhā phalīssati taṃ kiṃ maññasi ambaṭṭha kinti te sutaṃ brāhmaṇānaṃ vuḍḍhānaṃ mahallakānaṃ ācariyapācariyānaṃ bhāsamānānaṃ kutopabhūtikā kaṇhāyanā ko ca kaṇhāyanānaṃ pubbapurisoti. {151.1} Evaṃ vutte ambaṭṭho māṇavo tuṇhī ahosi . Dutiyampi kho bhagavā ambaṭṭhaṃ māṇavaṃ etadavoca taṃ kiṃ maññasi ambaṭṭha kinti te sutaṃ brāhmaṇānaṃ vuḍḍhānaṃ mahallakānaṃ ācariyapācariyānaṃ bhāsamānānaṃ kutopabhūtikā kaṇhāyanā ko ca kaṇhāyanānaṃ pubbapurisoti . dutiyampi kho ambaṭṭho māṇavo tuṇhī ahosi . athakho bhagavā ambaṭṭhaṃ māṇavaṃ etadavoca byākarohidāni ambaṭṭha nadāni te tuṇhībhāvassa kālo Yo kho ambaṭṭha tathāgatena yāvatatiyakaṃ sahadhammikaṃ pañhaṃ puṭṭho na byākaroti etthevassa sattadhā muddhā phalissatīti.

[152] Tena kho pana samayena vajirapāṇi yakkho mahantaṃ ayokūṭaṃ ādāya ādittaṃ sampajjalitaṃ saṃjotibhūtaṃ ambaṭṭhassa māṇavassa uparivehāsaṃ ṭhito hoti sacāyaṃ ambaṭṭho māṇavo bhagavatā yāvatatiyakaṃ sahadhammikaṃ pañhaṃ puṭṭho na byākarissati etthevassa sattadhā muddhaṃ phālessāmīti . taṃ kho pana vajirapāṇiṃ yakkhaṃ bhagavā ceva passati ambaṭṭho ca māṇavo . athakho ambaṭṭho māṇavo bhīto saṃviggo lomahaṭṭhajāto bhagavantaṃyeva tāṇaṃ gavesi bhagavantaṃyeva leṇaṃ gavesi bhagavantaṃyeva saraṇaṃ gavesi upanisīditvā bhagavantaṃ etadavoca kimetaṃ bhavaṃ gotamo āha puna bhavaṃ gotamo brūtūti . taṃ kiṃ maññasi ambaṭṭha kinti te sutaṃ brāhmaṇānaṃ vuḍḍhānaṃ mahallakānaṃ ācariyapācariyānaṃ bhāsamānānaṃ kutopabhūtikā kaṇhāyanā ko ca kaṇhāyanānaṃ pubbapurisoti . Evameva bho gotama sutaṃ yadeva bhavaṃ gotamo āha tatopabhūtikā kaṇhāyanā so ca kaṇhāyanānaṃ pubbapurisoti.