[158] Taṃ kiṃ maññasi ambaṭṭha idha khattiyā khattiyaṃ kismiñcideva Pakaraṇe khuramuṇḍaṃ karitvā bhassapuṭena vadhitvā raṭṭhā vā nagarā vā pabbājeyyuṃ apinu so labhetha brāhmaṇesu āsanaṃ vā udakaṃ vāti . labhetha bho gotama . apinu naṃ brāhmaṇā bhojeyyuṃ sadde vā thālipāke vā yaññe vā pāhune vāti . bhojeyyuṃ bho gotama . apinu naṃ brāhmaṇā mante vāceyyuṃ vā no vāti . vāceyyuṃ bho gotama . apinussa itthīsu āvaṭaṃ vā assa anāvaṭaṃ vāti . anāvaṭañhissa bho gotama . ettāvatā kho ambaṭṭha khattiyo paramanihīnatappatto hoti yadidaṃ khattiyā khuramuṇḍaṃ karitvā bhassapuṭena vadhitvā raṭṭhā vā nagarā vā pabbājenti . iti kho ambaṭṭha yadāpi khattiyo paramanihīnatappatto hoti tadāpi khattiyā va seṭṭhā hīnā brāhmaṇā . brahmunā cesā ambaṭṭha sanaṅkumārena gāthā bhāsitā

[159] Khattiyo seṭṭho janetasmiṃ ye gottapaṭisārino vijjācaraṇasampanno so seṭṭho devamānuseti.

[160] Sā kho panesā ambaṭṭha brahmunā sanaṅkumārena gāthā sugītā na duggītā subhāsitā na dubbhāsitā atthasañhitā no anatthasañhitā anumatā mayā ahaṃpi ambaṭṭha evaṃ vadāmi

[161] Khattiyo seṭṭho janetasmiṃ ye gottapaṭisārino vijjācaraṇasampanno so seṭṭho devamānuseti. Bhāṇavāraṃ paṭhamaṃ.