[184] Athakho soṇadaṇḍo brāhmaṇo yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi . campeyyakāpi kho brāhmaṇagahapatikā appekacce bhagavantaṃ abhivādetvā ekamantaṃ nisīdiṃsu appekacce bhagavatā saddhiṃ sammodiṃsu sammodanīyaṃ kathaṃ sārāṇīyaṃ vītisāretvā ekamantaṃ nisīdiṃsu appekacce yena bhagavā tenañjalimpaṇāmetvā ekamantaṃ nisīdiṃsu appekacce nāmagottaṃ sāvetvā ekamantaṃ nisīdiṃsu appekacce tuṇhībhūtā ekamantaṃ nisīdiṃsu . tatra sudaṃ soṇadaṇḍo brāhmaṇo etadeva bahulamanuvitakkento nisinno hoti ahañceva Kho pana samaṇaṃ gotamaṃ pañhaṃ puccheyyaṃ tatra ce maṃ samaṇo gotamo evaṃ vadeyya na kho esa brāhmaṇa pañho evaṃ pucchitabbo evaṃ nāmesa brāhmaṇa pañho pucchitabboti tena maṃ ayaṃ parisā paribhaveyya bālo soṇadaṇḍo brāhmaṇo abyatto nāsakkhi samaṇaṃ gotamaṃ yoniso pañhaṃ pucchitunti yaṃ kho panāyaṃ parisā paribhaveyya yasopi tassa hāyetha yassa kho pana yaso hāyetha bhogāpi tassa hāyeyyuṃ yasoladdhā kho panamhākaṃ bhogā mañceva kho pana samaṇo gotamo pañhaṃ puccheyya tassa cāhaṃ pañhassa veyyākaraṇena cittaṃ na ārādheyyaṃ tatra ce maṃ samaṇo gotamo evaṃ vadeyya na kho esa brāhmaṇa pañho evaṃ byākātabbo evaṃ nāmesa brāhmaṇa pañho byākātabboti tena maṃ ayaṃ parisā paribhaveyya bālo soṇadaṇḍo brāhmaṇo abyatto nāsakkhi samaṇassa gotamassa pañhassa veyyākaraṇena cittaṃ ārādhetunti yaṃ kho panāyaṃ parisā paribhaveyya yasopi tassa hāyetha yassa kho pana yaso hāyetha bhogāpi tassa hāyeyyuṃ yasoladdhā kho panamhākaṃ bhogā aho vata maṃ samaṇo gotamo sake ācariyake tevijjake maṃ pañhaṃ puccheyya addhā va tassāhaṃ cittaṃ ārādheyya pañhassa veyyākaraṇenāti.

[185] Athakho bhagavato soṇadaṇḍassa brāhmaṇassa cetasā cetoparivitakkamaññāya etadahosi vihaññati kho ayaṃ soṇadaṇḍo Brāhmaṇo sakena cittena yananūnāhaṃ soṇadaṇḍaṃ brāhmaṇaṃ sake ācariyake tevijjake pañhaṃ puccheyyanti . athakho bhagavā soṇadaṇḍaṃ brāhmaṇaṃ etadavoca katīhi pana brāhmaṇa aṅgehi samannāgataṃ brāhmaṇā brāhmaṇaṃ paññapenti brāhmaṇosmīti ca vadamāno sammā vadeyya na ca pana musāvādaṃ āpajjeyyāti . athakho soṇadaṇḍassa brāhmaṇassa etadahosi yaṃ vata no ahosi icchitaṃ yaṃ ākaṅkhitaṃ yaṃ adhippetaṃ yaṃ abhipatthitaṃ aho vata maṃ samaṇo gotamo sake ācariyake tevijjake pañhaṃ puccheyya addhā va tassāhaṃ cittaṃ ārādheyyaṃ pañhassa veyyākaraṇena tatra ce maṃ samaṇo gotamo sake ācariyake tevijjake pañhaṃ pucchati addhā va tassāhaṃ cittaṃ ārādhessāmi pañhassa veyyākaraṇenāti.