[191] Evaṃ vutte soṇadaṇḍo brāhmaṇo bhagavantaṃ etadavoca tiṭṭhatu bhavaṃ gotamo tuṇhī bhavaṃ gotamo hotu ahameva tesaṃ Sahadhammena paṭivacanaṃ karissāmīti . athakho soṇadaṇḍo te brāhmaṇe etadavoca mā bhavanto evaṃ avacuttha mā bhavanto evaṃ avacuttha apavadati bhavaṃ soṇadaṇḍo brāhmaṇo vaṇṇaṃ apavadati mante apavadati jātiṃ ekaṃsena bhavaṃ soṇadaṇḍo brāhmaṇo samaṇasseva gotamassa vādaṃ anupakkhandatīti nāhaṃ bho apavadāmi vaṇṇaṃ vā mante vā jātiṃ vāti.

[192] Tena kho pana samayena soṇadaṇḍassa brāhmaṇassa bhāgineyyo aṅgako nāma māṇavako tassaṃ parisāyaṃ nisinno hoti . athakho soṇadaṇḍo brāhmaṇo te brāhmaṇe etadavoca passanti no bhonto imaṃ aṅgakaṃ māṇavakaṃ amhākaṃ bhāgineyyanti . Evaṃ bho aṅgako kho bho māṇavako abhirūpo dassanīyo pāsādiko paramāya vaṇṇapokkharatāya samannāgato brahmavaṇṇi brahmavacchasi akkhuddāvakāso dassanāya nāssa imissaṃ parisāyaṃ samasamo atthi vaṇṇena ṭhapetvā samaṇaṃ gotamaṃ . aṅgako kho māṇavako ajjhāyako mantadharo tiṇṇaṃ vedānaṃ pāragū sanighaṇḍuketubhānaṃ sākkharappabhedānaṃ itihāsapañcamānaṃ padako veyyākaraṇo lokāyatamahāpurisalakkhaṇesu anavayo ahamassa mante vācetā aṅgako kho māṇavako ubhato sujāto mātito ca pitito ca saṃsuddhagahaṇiko yāva sattamā pitāmahayugā akkhitto anupakkuṭṭho jātivādena ahamassa mātāpitaro jānāmi aṅgako kho māṇavako pāṇaṃpi haneyya adinnaṃpi Ādiyeyya paradāraṃpi gaccheyya musāpi bhāseyya majjaṃpi piveyya etthadāni kiṃ vaṇṇo karissati kiṃ mantā kiṃ jāti yato kho bho brāhmaṇo sīlavā ca hoti vuḍḍhasīlī vuḍḍhasīlena samannāgato paṇḍito ca hoti medhāvī paṭhamo vā dutiyo vā pūjaṃ paggaṇhantānaṃ imehi kho bho dvīhi aṅgehi samannāgataṃ brāhmaṇā brāhmaṇaṃ paññapenti brāhmaṇosmīti ca vadamāno sammā vadeyya na ca pana musāvādaṃ āpajjeyyāti.

[193] Imesaṃ pana brāhmaṇa dvinnaṃ aṅgānaṃ sakkā ekaṃ aṅgaṃ ṭhapayitvā ekena aṅgena samannāgataṃ brāhmaṇaṃ paññapetuṃ brāhmaṇosmīti ca vadamāno sammā vadeyya na ca pana musāvādaṃ āpajjeyyāti . no hidaṃ bho gotama sīlaparidhotā hi bho gotama paññā paññāparidhotaṃ sīlaṃ yattha sīlaṃ tattha paññā yattha paññā tattha sīlaṃ sīlavato paññā paññavato sīlaṃ sīlapaññānañca pana lokasmiṃ aggamakkhāyati seyyathāpi bho gotama hatthena vā hatthaṃ dhoveyya pādena vā pādaṃ dhoveyya evameva kho bho gotama sīlaparidhotā paññā paññāparidhotaṃ sīlaṃ yattha sīlaṃ tattha paññā yattha paññā tattha sīlaṃ sīlavato paññā paññavato sīlaṃ sīlapaññānañca pana lokasmiṃ aggamakkhāyatīti.