[197] Athakho soṇadaṇḍo brāhmaṇo tassā rattiyā accayena sake nivesane paṇītaṃ khādanīyaṃ bhojanīyaṃ paṭiyādāpetvā bhagavato kālaṃ ārocāpesi kālo bho gotama niṭṭhitaṃ bhattanti . athakho bhagavā pubbaṇhasamayaṃ nivāsetvā pattacīvaramādāya saddhiṃ bhikkhusaṃghena yena soṇadaṇḍassa brāhmaṇassa nivesanaṃ tenupasaṅkami upasaṅkamitvā paññatte āsane nisīdi . athakho soṇadaṇḍo brāhmaṇo buddhappamukhaṃ bhikkhusaṃghaṃ paṇītena khādanīyena bhojanīyena sahatthā santappesi sampavāresi.

[198] Athakho soṇadaṇḍo brāhmaṇo bhagavantaṃ bhuttāviṃ onītapattapāṇiṃ aññataraṃ nīcaṃ āsanaṃ gahetvā ekamantaṃ nisīdi. {198.1} Ekamantaṃ nisinno kho soṇadaṇḍo brāhmaṇo bhagavantaṃ etadavoca ahañceva kho pana bho gotama parisagato samāno āsanā vuṭṭhahitvā bhavantaṃ gotamaṃ abhivādeyyaṃ tena maṃ sā parisā paribhaveyya yaṃ kho pana sā parisā paribhaveyya yasopi tassa hāyetha yassa kho pana yaso hāyetha bhogāpi tassa hāyeyyuṃ yasoladdhā kho panamhākaṃ bhogā ahañceva kho pana ko gotama parisagato samāno añjaliṃ paggaṇheyyaṃ āsanā me taṃ bhavaṃ gotamo paccuṭṭhānaṃ dhāretu ahañceva kho pana bho gotama parisagato samāno veṭṭhanaṃ omuñceyyaṃ sirasā me taṃ bhavaṃ gotamo abhivādanaṃ dhāretu ahañceva kho pana bho gotama yānagato samāno yānā paccorohitvā bhavantaṃ gotamaṃ abhivādeyyaṃ tena maṃ sā parisā paribhaveyya yaṃ kho pana sā parisā paribhaveyya yasopi tassa hāyetha yassa kho pana yaso hāyetha bhogāpi tassa hāyeyyuṃ yasoladdhā kho panamhākaṃ bhogā ahañceva kho pana bho gotama yānagato samāno patodalaṭṭhiṃ abbhunnameyyaṃ yānā me taṃ bhavaṃ gotamo paccorohanaṃ dhāretu ahañceva kho pana bho gotama yānagato samāno chattaṃ apanāmeyyaṃ sirasā me taṃ bhavaṃ gotamo abhivādanaṃ dhāretūti . Athakho bhagavā soṇadaṇḍaṃ brāhmaṇaṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā pakkāmīti. Soṇadaṇḍasuttaṃ catutthaṃ niṭṭhitaṃ. -------------