[226] Siyā kho pana bhoto rañño mahāyaññaṃ yajamānassa kocideva vattā rājā kho mahāvijito mahāyaññaṃ yajati no ca khvassa purohito brāhmaṇo ajjhāyako mantadharo tiṇṇaṃ vedānaṃ pāragū sanighaṇḍuketubhānaṃ sākkharappabhedānaṃ itihāsapañcamānaṃ padako veyyākaraṇo lokāyatamahāpurisalakkhaṇesu anavayo no ca khvassa purohito brāhmaṇo sīlavā vuḍḍhasīlī vuḍḍhasīlena samannāgato no ca khvassa purohito brāhmaṇo paṇḍito viyatto medhāvī paṭhamo vā dutiyo vā pūjaṃ paggaṇhantānaṃ atha ca pana bhavaṃ Rājā evarūpaṃ mahāyaññaṃ yajatīti . evaṃpi bhoto rañño vattā dhammato natthi . bhoto kho pana rañño purohito brāhmaṇo paṇḍito viyatto medhāvī paṭhamo vā dutiyo vā pūjaṃ paggaṇhantānaṃ imināpetaṃ bhavaṃ rājā jānātu yajataṃ bhavaṃ sajjataṃ bhavaṃ modataṃ bhavaṃ cittameva bhavaṃ antaraṃ pasādetūti . imehi kho brāhmaṇa purohito brāhmaṇo rañño mahāvijitassa mahāyaññaṃ yajamānassa soḷasahi ākārehi cittaṃ sandassesi samādapesi samuttejesi sampahaṃsesi.
[227] Tasmiṃ kho pana brāhmaṇa yaññe neva gāvo haññiṃsu na ajeḷakā haññiṃsu na kukkuṭasūkarā haññiṃsu na vividhā pāṇā saṃghātaṃ āpajjiṃsu na rukkhā chindiṃsu yūpatthāya na dabbā lāyiṃsu parihiṃsatthāya . yepissa ahesuṃ dāsāti vā pessāti vā kammakarāti vā tepi na daṇḍatajjitā na bhayatajjitā na assumukhā rodamānā parikammāni akaṃsu . athakho ye icchiṃsu te akaṃsu ye na icchiṃsu na te akaṃsu . yaṃ icchiṃsu taṃ akaṃsu yaṃ na icchiṃsu na taṃ akaṃsu. Sappitelanavanītadadhimadhuphāṇitena ceva so yañño niṭṭhānamagamāsi.
[228] Athakho brāhmaṇa khattiyā anuyantā negamā ceva jānapadā ca . amaccā pārisajjā negamā ceva jānapadā ca . Brāhmaṇamahāsālā negamā ceva jānapadā ca . gahapatinecayikā Negamā ceva jānapadā ca pahūtaṃ sāpateyyaṃ ādāya rājānaṃ mahāvijitaṃ upasaṅkamitvā evamāhaṃsu idaṃ te deva pahūtaṃ sāpateyyaṃ devaṃyeva uddissa ābhataṃ taṃ devo paṭiggaṇhātūti . alaṃ bho mamāpi idaṃ pahūtaṃ sāpateyyaṃ dhammikena balinā abhisaṃkhataṃ tañca vo hotu ito ca bhiyyo harathāti . te raññā paṭikkhittā ekamantaṃ apakkamma evaṃ samacintesuṃ na kho etaṃ amhākaṃ paṭirūpaṃ yaṃ mayaṃ imāni sāpateyyāni punadeva sakāni gharāni paṭiggaṇheyyāma rājā kho mahāvijito mahāyaññaṃ yajati handassa mayaṃ anuyāgino homāti.