[233] Atthi pana bho gotama añño yañño imāya ca tividhāya .pe. mahānisaṃsataro cāti . atthi kho brāhmaṇa añño yañño .pe. katamo pana so bho gotama añño yañño .pe. yo kho brāhmaṇa pasannacitto buddhaṃ saraṇaṃ gacchati dhammaṃ saraṇaṃ gacchati saṃghaṃ saraṇaṃ gacchati ayaṃ kho brāhmaṇa yañño imāya ca tividhāya yaññasampadāya soḷasaparikkhārāya iminā ca niccadānena anukūlayaññena iminā ca vihāradānena appatthataro ca appasamārambhataro ca mahapphalataro ca mahānisaṃsataro cāti.
[234] Atthi pana bho gotama añño yañño imāya ca tividhāya yaññasampadāya soḷasaparikkhārāya iminā ca niccadānena anukūlayaññena .pe. appatthataro ca appasamārambhataro ca mahapphalataro ca mahānisaṃsataro cāti . atthi kho brāhmaṇa añño yañño imāya ca tividhāya .pe. katamo pana so bho gotama añño yañño imāya ca tividhāya .pe. yo kho brāhmaṇa pasannacitto sikkhāpadāni samādiyati pāṇātipātā veramaṇī adinnādānā veramaṇī kāmesu micchācārā veramaṇī musāvādā veramaṇī surāmerayamajjapamādaṭṭhānā veramaṇī ayaṃ kho brāhmaṇa Yañño imāya ca tividhāya yaññasampadāya soḷasaparikkhārāya iminā ca niccadānena anukūlayaññena .pe. appatthataro ca appasamārambhataro ca mahapphalataro ca mahānisaṃsataro cāti.
[235] Atthi pana bho gotama añño yañño imāya ca tividhāya yaññasampadāya soḷasaparikkhārāya iminā ca niccadānena anukūlayaññena .pe. atthi kho brāhmaṇa añño yañño imāya ca tividhāya yaññasampadāya soḷasaparikkhārāya iminā ca niccadānena anukūlayaññena iminā ca vihāradānena imehi ca saraṇagamanehi imehi ca sikkhāpadehi appatthataro ca appasamārambhataro ca mahapphalataro ca mahānisaṃsataro cāti. {235.1} Katamo pana so bho gotama añño yañño imāya ca tividhāya yaññasampadāya .pe. appatthataro ca appasamārambhataro ca mahapphalataro ca mahānisaṃsataro cāti . idha brāhmaṇa tathāgato loke uppajjati arahaṃ sammāsambuddho .pe. (yathā sāmaññaphale evaṃ sabbaṃ vitthāretabbaṃ) .pe. evaṃ kho brāhmaṇa bhikkhu sīlasampanno hoti . paṭhamaṃ jhānaṃ upasampajja viharati . ayaṃ kho brāhmaṇa yañño purimehi yaññehi appatthataro ca appasamārambhataro ca mahapphalataro ca mahānisaṃsataro ca . dutiyaṃ jhānaṃ . tatiyaṃ jhānaṃ . catutthaṃ jhānaṃ upasampajja viharati . ayaṃpi kho brāhmaṇa yañño purimehi yaññehi appatthataro ca appasamārambhataro ca mahapphalataro ca Mahānisaṃsataro ca . ñāṇadassanāya cittaṃ abhinīharati abhininnāmeti khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāti . ayaṃ kho brāhmaṇa yañño purimehi yaññehi appatthataro ca appasamārambhataro ca mahapphalataro ca mahānisaṃsataro ca imāya ca brāhmaṇa yaññasampadāya aññā yaññasampadā uttaritarā vā paṇītatarā vā natthīti.