เรื่องภิกษุพวกฝั่งแม่น้ำวัคคุมุทา

จตุตฺถปาราชิกวณฺณนา

จตุสจฺจวิทู สตฺถา จตุตฺถํ ยํ ปกาสยิ

ปาราชิกํ ตสฺส ทานิ ปตฺโต สํวณฺณนากฺกโม

ยสฺมา ตสฺมา สุวิญฺเญยฺยํ ยํ ปุพฺเพ จ ปกาสิตํ

ตํ วชฺชยิตฺวา อสฺสาปิ โหติ สํวณฺณนา อยํ ฯ

{๑๙๓} เตน สมเยน พุทฺโธ ภควา เวสาลิยํ วิหรติ ฯเปฯ คิหีนํ กมฺมนฺตํ อธิฏฺเฐมาติ คิหีนํ เขตฺเตสุ เจว อารามาทีสุ จ กตฺตพฺพกิจฺจํ อธิฏฺฐาม ฯ เอวํ กาตพฺพํ เอวํ น กาตพฺพนฺติ อาจิกฺขาม เจว อนุสาสาม จาติ วุตฺตํ โหติ ฯ ทูเตยฺยนฺติ ทูตกมฺมํ ฯ อุตฺตริมนุสฺสธมฺมสฺสาติ มนุสฺเส อุตฺติณฺณธมฺมสฺส ฯ มนุสฺเส อติกฺกมิตฺวา พฺรหฺมตฺตํ วา นิพฺพานํ วา ปาปนกธมฺมสฺสาติ อตฺโถ ฯ อุตฺตริมนุสฺสานํ วา เสฏฺฐปุริสานํ ฌายีนญฺเจว อริยานญฺจ ธมฺมสฺส ฯ อสุโก ภิกฺขูติอาทีสุ อตฺตนา เอวํ มนฺตยิตฺวา ปจฺฉา คิหีนํ ภาสนฺตา พุทฺธรกฺขิโต นาม ภิกฺขุ ปฐมสฺส ฌานสฺส ลาภี ธมฺมรกฺขิโต ทุติยสฺสาติ เอวํ นามวเสเนว วณฺณํ ภาสึสูติ เวทิตพฺพา ฯ ตตฺถ เอโสเยว โข อาวุโส เสยฺโยติ กมฺมนฺตาธิฏฺฐานํ ทูเตยฺยหรณญฺจ พหุสปตฺตํ มหาสมารมฺภํ น จ สมณสารุปฺปํ ตโต ปน อุภยโต เอโสเยว ปาสํสตโร อนุตฺตโร สุนฺทรตโร โย อมฺหากํ คิหีนํ อญฺญมญฺญสฺส อุตฺตริมนุสฺสธมฺมสฺส วณฺโณ ภาสิโต ฯ กึ วุตฺตํ โหติ ฯ อิริยาปถํ สณฺฐเปตฺวา นิสินฺนํ วา จงฺกมนฺตํ วา ปุจฺฉนฺตานํ วา อปุจฺฉนฺตานํ วา คิหีนํ อยํ อสุโก นาม ภิกฺขุ ปฐมสฺส ฌานสฺส ลาภีติเอวมาทินา นเยน โย อมฺหากํ อญฺญมญฺญสฺส อุตฺตริมนุสฺสธมฺมสฺส วณฺโณ ภาสิโต ภวิสฺสติ เอโสเยว เสยฺโยติ ฯ อนาคตสมฺพนฺเธ ปน อสติ น ๑- เอเตหิ โส ตสฺมึ ขเณ ภาสิโตว ตสฺมา น ยุชฺชติ ตสฺมา อนาคตสมฺพนฺธํ กตฺวา โย เอวํ ภาสิโต ภวิสฺสติ โส เสยฺโยติ เอวเมตฺถ อตฺโถ เวทิตพฺโพ ฯ ลกฺขณํ ปน สทฺทสตฺถโต ปริเยสิตพฺพํ ฯ

{๑๙๔} วณฺณวา อเหสุนฺติ อญฺโญเยว เตสํ อภินโว สรีรวณฺโณ อุปฺปชฺชติ เตน วณฺเณน วณฺณวนฺโต อเหสุํ ฯ ปีนินฺทฺริยาติ ปญฺจหิ ปสาเทหิ อภินิวิฏฺโฐกาสสฺส ปริปุณฺณตฺตา มนฉฏฺฐานํ อินฺทฺริยานํ อมิลาตภาเวน ปีนินฺทฺริยา ฯ ปสนฺนมุขวณฺณาติ กิญฺจาปิ อวิเสเสน วณฺณวนฺโต สรีรวณฺณโต ปน เนสํ มุขวณฺโณ อธิกตรํ ปสนฺโน อจฺโฉ อนาวิโล ปริสุทฺโธติ อตฺโถ ฯ วิปฺปสนฺนจฺฉวิวณฺณาติ เยน จ เต กณฺณิการปุปฺผสทิเสน วณฺเณน วณฺณวนฺโต ตาทิโส สญฺเญสํปิ มนุสฺสานํ วณฺโณ อตฺถิ ยถา ปน อิเมสํ เอวํ น เตสํ ฉวิวณฺโณ วิปฺปสนฺโน ฯ เตน วุตฺตํ วิปฺปสนฺนจฺฉวิวณฺณาติ ฯ อิติห เต ภิกฺขู เนว อุทฺเทสปริปุจฺฉํ น กมฺมฏฺฐานํ อนุยุญฺชนฺตา อถโข กุหกตาย

@เชิงอรรถ: ๑. ปมาทลิขิโต ภเวยฺย ฯ อภูตคุณสํวณฺณนาย ลทฺธานิ ปณีตโภชนานิ ภุญฺชิตฺวา ยถาสุขํ นินฺทารามตํ สงฺคณิการามตญฺจ อนุยุญฺชนฺตา อิมํ สรีรโสภํ ปาปุณึสุ ยถา ตํ พาลา ภนฺตมิคปฏิภาคาติ ฯ วคฺคุมุทาตีริยาติ วคฺคุมุทาตีรวาสิโน ฯ กจฺจิ ภิกฺขเว ขมนียนฺติ ภิกฺขเว กจฺจิ ตุมฺหากํ อิทํ จตุจฺจกฺกํ นวทฺวารํ สรีรยนฺตํ ขมนียํ สกฺกา ขมิตุํ สหิตุํ ปริหริตุํ น กิญฺจิ ทุกฺขํ อุปฺปาเทตีติ ฯ กจฺจิ ยาปนียนฺติ กจฺจิ สพฺพกิจฺเจสุ ยาเปตุํ คเมตุํ สกฺกา น กิญฺจิ อนฺตรายํ ทสฺเสตีติ ฯ กุจฺฉิ ปริกนฺโตติ กุจฺฉิ ปริกนฺติโต วรํ ภเวยฺย ฯ กุจฺฉิ ปริกตฺโถติปิ ๑- ปาโฐ ยุชฺชติ ฯ

เอวํ วคฺคุมุทาตีริเย อเนกปริยาเยน วิครหิตฺวา อิทานิ ยสฺมา เตหิ กตกมฺมํ โจรกมฺมํ โหติ ตสฺมา อายตึ อญฺเญสมฺปิ เอวรูปสฺส กมฺมสฺส อกรณตฺถํ อถโข ภควา ภิกฺขู อามนฺเตสิ

{๑๙๕} อามนฺเตตฺวา จ ปน ปญฺจิเม ภิกฺขเว มหาโจราติอาทิมาห ฯ ตตฺถ สนฺโต สํวิชฺชมานาติ อตฺถิ เจว อุปลพฺภนฺติ จาติ วุตฺตํ โหติ ฯ อิธาติ อิมสฺมึ สตฺตโลเก ฯ เอวํ โหตีติ เอวํ ปุพฺพภาเค อิจฺฉา อุปฺปชฺชติ ฯ กุทาสุ นามาหนฺติ เอตฺถ สุอิติ นิปาโต ฯ กุทา นามาติ อตฺโถ ฯ โส อปเรน สมเยนาติ โส ปุพฺพภาเค เอวํ จินฺเตตฺวา อนุกฺกเมน ปริสํ วฑฺเฒนฺโต ปนฺถทุหนกมฺมํ ปจฺจนฺติมคามวิโลปนฺติเอวมาทีนิ กตฺวา เวปุลฺลปฺปตฺตปุริโส หุตฺวา คาเมปิ อคาเม ชนปเทปิ อชนปเท กโรนฺโต หนนฺโต ฆาเตนฺโต ฯเปฯ ปจนฺโต ปาเจนฺโต ฯ อิติ พาหิรกโจรํ ทสฺเสตฺวา เตน

@เชิงอรรถ: ๑. ปริกตฺโตติ มญฺเญ ฯ สทิเส สาสเน ปญฺจ มหาโจเร ทสฺเสตุํ เอวเมว โขติอาทิมาห ฯ ตตฺถ ปาปภิกฺขุโนติ อญฺเญสุ ฐาเนสุ มูลจฺฉินฺโน ปาราชิกปฺปตฺโต ปาปภิกฺขูติ วุจฺจติ ฯ อิธ ปน ปาราชิกํ อนาปนฺโน อิจฺฉาจาเร ฐิโต ขุทฺทานุขุทฺทกานิ สิกฺขาปทานิ มทฺทิตฺวา จรนฺโต ปาปภิกฺขูติ อธิปฺเปโต ฯ ตสฺสาปิ พาหิรกมหาโจรสฺส วิย ปุพฺพภาเค เอวํ โหติ กุทาสุ นามาหํ ฯเปฯ ปริกฺขารานนฺติ ฯ ตตฺถ สกฺกโตติ สกฺการปฺปตฺโต ฯ ครุกโตติ ครุกปฺปตฺโต ฯ มานิโตติ มนสา ปิยายิโต ฯ ปูชิโตติ จตุปฺปจฺจยาภิหารปูชาย ปูชิโต ฯ อปจิโตติ อปจิติปฺปตฺโต ฯ ตตฺถ ยสฺส จตฺตาโร ปจฺจเย สกฺกริตฺวา สุฏฺฐุ อภิสงฺขเต ๑- ปณีตปฺปณีเต กตฺวา เทนฺติ โส สกฺกโต ฯ ยสฺมึ ครุภาวํ ปจฺจุปฏฺฐเปตฺวา เทนฺติ โส ครุกโต ฯ ยํ มนสา ปิยายนฺติ โส มานิโต ฯ ตสฺส สพฺพํเปตํ กโรนฺติ โส ปูชิโต ฯ ยสฺส อภิวาทนปจฺจุฏฺฐาน- อญฺชลิกมฺมาทิวเสน ปรมนิปจฺจการํ กโรนฺติ โส อปจิโต ฯ อิมสฺส ปน สพฺพมฺปิ อิมํ โลกามิสํ ปฏฺฐยมานสฺส เอวํ โหติ ฯ โส อปเรน สมเยนาติ โส ปุพฺพภาเค เอวํ จินฺเตตฺวา อนุกฺกเมน สิกฺขาย อติพฺพคารเว อุทฺธเต อุนฺนเฬ จปเล มุขเร วิกิณฺณวาเจ มุฏฺฐสฺสตี อสมฺปชาเน ปากฏินฺทฺริเย อาจริยอุปชฺฌาเยหิ ปริจฺจตฺตเก ลาภครุเก ปาปภิกฺขู สงฺคณฺหิตฺวา อิริยาปถสณฺฐปนาทีนิ กุหกวตฺตานิ สิกฺขาเปตฺวา อยํ เถโร อมุกสฺมึ นาม เสนาสเน

@เชิงอรรถ: ๑. กตฺถจิ สงฺขเฏติ ลิขิยติ ฯ วสฺสํ อุปคมฺม วตฺตปฏิวตฺตํ ปูรยมาโน วสฺสํ วสิตฺวา นิคฺคโตติ โลกสมฺมตเสนาสนสํวณฺณนาทีหิ อุปาเยหิ โลกํ ปริปาเจตุํ ปฏิพเลหิ ชาตกาทีสุ กตปริจฺจเยหิ สรสมฺปนฺเนหิ ปาปภิกฺขูหิ สํวณฺณิยมานคุโณ หุตฺวา สเตน วา สหสฺเสน วา ปริวุโต ฯเปฯ เภสชฺชปริกฺขารานํ ฯ อยํ ภิกฺขเว ปฐโม มหาโจโรติ อยํ สนฺธิจฺเฉทกาทิโจรโก วิย น เอกํ กุลํ น เทฺว อถโข มหาชนํ วญฺเจตฺวา จตุปฺปจฺจยคฺคหณโต ปฐโม มหาโจโรติ เวทิตพฺโพ ฯ เย ปน สุตฺตนฺติกา วา อาภิธมฺมิกา วา วินยธรา วา ภิกฺขู ภิกฺขาจาเร อสมฺปชฺชมาเน ปาลึ วาเจนฺตา อฏฺฐกถํ กเถนฺตา อนุโมทนาย ธมฺมกถาย อิริยาปถสมฺปตฺติยา จ โลกํ ปสาเทนฺตา ชนปทจาริกํ จรนฺติ สกฺกตา ครุกตา มานิตา ปูชิตา อปจิตา เต ตนฺติปฺปเวณิฆฏนกา สาสนโชตกาติ เวทิตพฺพา ฯ ตถาคตปฺปเวทิตนฺติ ตถาคเตน ปฏิวิทฺธํ ปจฺจกฺขกตํ ชานาปิตํ วา ฯ อตฺตโน ทหตีติ ปริสมชฺเฌ ปาลิญฺจ อฏฺฐกถญฺจ สํสนฺเทตฺวา มธุเรน สทฺเทน ปสาทนียํ สุตฺตนฺตํ กเถตฺวา ธมฺมกถาวสาเน อจฺฉริยพฺภุตชาเตน วิญฺญุชเนน อโห ภนฺเต ปาลิ จ อฏฺฐกถา จ สุปริสุทฺธา กสฺส สนฺติเก อุคฺคณฺหิตฺถาติ ปุจฺฉิโต โก อมฺหาทิเส อุคฺคณฺหาเปตุํ สมตฺโถติ อาจริยํ อนุทฺทิสิตฺวา อตฺตนา ปฏิวิทฺธํ สยมฺภูญาณาธิคตํ ธมฺมวินยํ ปเวเทติ ฯ อยํ ตถาคเตน สตสหสฺสกปฺปาธิกานิ จตฺตาริ อสงฺเขยฺยานิ ปารมิโย ปูเรตฺวา กิจฺเฉน กสิเรน ปฏิวิทฺธธมฺมตฺเถนโก ทุติโย มหาโจโร ฯ สุทฺธํ พฺรหฺมจารินฺติ ขีณาสวํ ภิกฺขุํ ฯ ปริสุทฺธํ พฺรหฺมจริยํ จรนฺตนฺติ นิรุปกฺกิเลสํ เสฏฺฐจริยํ จรนฺตํ ฯ อญฺญํปิ วา อนาคามึ อาทึ กตฺวา ยาว สีลวนฺตํ ปุถุชฺชนํ อวิปฏิสาราทิวตฺถุกํ ปริสุทฺธํ พฺรหฺมจริยํ จรนฺตํ ฯ อมูลเกน อพฺรหฺมจริเยน อนุทฺธํเสตีติ ตสฺมึ ปุคฺคเล อวิชฺชมาเนน อนฺติมวตฺถุนา อนุวทติ โจเทติ ฯ อยํ วิชฺชมานคุณมกฺขี อริยคุณตฺเถนโก ตติโย มหาโจโร ฯ ครุภณฺฑานิ ครุปริกฺขารานีติ ยถา อทินฺนาทาเน จตุโร ชนา สํวิธาย ครุภณฺฑํ อวาหรุนฺติ เอตฺถ ปญฺจมาสกคฺฆนกํ ครุภณฺฑนฺติ วุจฺจติ อิธ น เอวํ อถโข ปญฺจิมานิ ภิกฺขเว อวิสฺสชฺชนียานิ น วิสฺสชฺเชตพฺพานิ สงฺเฆน วา คเณน วา ปุคฺคเลน วา วิสฺสชฺชิตานิปิ อวิสฺสชฺชิตานิ โหนฺติ โย วิสฺสชฺเชยฺย อาปตฺติ ถุลฺลจฺจยสฺส กตมานิ ปญฺจ อาราโม อารามวตฺถุ ฯเปฯ ทารุภณฺฑํ มตฺติกาภณฺฑนฺติ วจนโต อวิสฺสชฺชิตพฺพตฺตา ครุภณฺฑานิ ปญฺจิมานิ ภิกฺขเว อเวภงฺคิยานิ น วิภชิตพฺพานิ สงฺเฆน วา คเณน วา ปุคฺคเลน วา วิภตฺตานิปิ อวิภตฺตานิ โหนฺติ โย วิภเชยฺย อาปตฺติ ถุลฺลจฺจยสฺส กตมานิ ปญฺจ อาราโม อารามวตฺถุ ฯเปฯ ทารุภณฺฑํ มตฺติกาภณฺฑนฺติ วจนโต อเวภงฺคิกตฺตา สาธารณปริกฺขารภาเวน ครุปริกฺขารานิ ฯ อาราโม อารามวตฺถูติอาทีสุ ยํ วตฺตพฺพํ ตํ สพฺพํ ปญฺจิมานิ ภิกฺขเว อวิสฺสชฺชิย นีติ ขนฺธเก อาคตสุตฺตวณฺณนายเมว ภณิสฺสาม ฯ เตหิ คิหี สงฺคณฺหาตีติ ตานิ ทตฺวา คิหี สงฺคณฺหาติ อนุคฺคณฺหาติ ฯ อุปลาเปตีติ อโห อมฺหากํ อยฺโยติ เอวํ ลปนเก อนุพนฺธนเก สิเนเห ๑- กโรติ ฯ อยํ อวิสฺสชฺชิยํ อเวภงฺคิยญฺจ ครุปริกฺขารํ ตถาภาวโต เถเนตฺวา คิหิสงฺคณฺหนโก จตุตฺโถ มหาโจโร ฯ โส จ ปนายํ อิมํ ครุภณฺฑํ กุลสงฺคณฺหนตฺถํ วิสฺสชฺเชนฺโต กุลทูสกทุกฺกฏํ อาปชฺชติ ปพฺพาชนียกมฺมารโห จ โหติ ภิกฺขุสงฺฆํ อภิภวิตฺวา อิสฺสรวตาย วิสฺสชฺเชนฺโต ถุลฺลจฺจยํ อาปชฺชติ เถยฺยจิตฺเตน วิสฺสชฺเชนฺโต ภณฺฑํ อคฺฆาเปตฺวา กาเรตพฺโพติ ฯ อยํ อคฺโค มหาโจโรติ อยํ อิเมสํ มหาโจรานํ เชฏฺฐโจโร อิมินา สทิโส โจโร นาม นตฺถิ โย ปญฺจินฺทฺริยคฺคหณาตีตํ อติสณฺหํ สุขุมํ โลกุตฺตรธมฺมํ เถเนติ ฯ กึ ปน สกฺกา โลกุตฺตรธมฺโม หิรญฺญสุวณฺณาทีนิ วิย วญฺเจตฺวา เถเนตฺวา คเหตุนฺติ ฯ น สกฺกา ฯ เตเนวาห โย อสนฺตํ อภูตํ อุตฺตริมนุสฺสธมฺมํ อุลฺลปตีติ ฯ อยํ หิ อตฺตนิ อสนฺตํ ธมฺมํ เกวลํ อตฺถิ มยฺหํ เอโสติ อุลฺลปติ น ปน สกฺโกติ ฐานา จาเวตุํ อตฺตนิ วา สํวิชฺชมานํ กาตุํ ฯ อถ กสฺมา โจโรติ วุตฺโตติ ฯ ยสฺมา ตํ อุลฺลปิตฺวา อสนฺตสมฺภาวนาย อุปฺปนฺเน ปจฺจเย คณฺหาติ เอวํ หิ คณฺหตา เต ปจฺจยา สุขุเมน อุปาเยน วญฺเจตฺวา เถเนตฺวา คหิตา โหนฺติ ฯ เตเนวาห ตํ กิสฺส เหตุ เถยฺยาย โว ภิกฺขเว รฏฺฐปิณฺโฑ ภุตฺโตติ ฯ อยญฺหิ เอตฺถ อตฺโถ ยํ อโวจุมฺหา อยํ อคฺโค มหาโจโร โย อสนฺตํ อภูตํ อุตฺตริมนุสฺสธมฺมํ อุลฺลปตีติ ตํ กิสฺส เหตุ

@เชิงอรรถ: ๑. สสิเนเห ฯ เกน การเณน เอตํ อโวจุมฺหาติ เจ เถยฺยาย โว ภิกฺขเว รฏฺฐปิณฺโฑ ภุตฺโตติ ภิกฺขเว ยสฺมา โว เตน รฏฺฐปิณฺโฑ เถยฺยจิตฺเตน ภุตฺโต โหติ ฯ เอตฺถ หิ โวกาโร เย หิ โว อริยา อรญฺญวนปฏฺฐานีติอาทีสุ วิย ปทปูรณมตฺเต นิปาโต ฯ ตสฺมา ตุมฺเหหิ ภุตฺโตติ เอวมสฺส อตฺโถ น ๑- ทฏฺฐพฺโพ ฯ อิทานิ ตเมวตฺถํ คาถาหิ วิภูตตรํ กโรนฺโต อญฺญถา สนฺตนฺติอาทิมาห ฯ ตตฺถ อญฺญถา สนฺตนฺติ อปริสุทฺธกายสมาจาราทิเกน อญฺเญน อากาเรน สนฺตํ ฯ อญฺญถา โย ปเวทเยติ ปริสุทฺธกาย- สมาจาราทิเกน อญฺเญน อากาเรน โย ปเวเทยฺย ปรมปริสุทฺโธ อหํ อตฺถิ เม อพฺภนฺตเร โลกุตฺตรธมฺโมติ เอวํ ชานาเปยฺย ฯ ปเวเทตฺวา จ ปน ตาย ปเวทนาย อุปฺปนฺนํ โภชนํ อรหา วิย ภุญฺชติ ฯ นิกจฺจ กิตวสฺเสว ภุตฺตํ เถยฺเยน ตสฺส ตนฺติ นิกจฺจาติ วญฺเจตฺวา อญฺญถา สนฺตํ อญฺญถา ทสฺเสตฺวา อคุมฺพาคจฺฉภูตเมว สาขาปลาสปลฺลวาทิจฺฉาทเนน คุมฺพมิว คจฺฉมิว จ อตฺตานํ ทสฺเสตฺวา ฯ กิตวสฺเสวาติ วญฺจกสฺส เกราฏิกสฺส คุมฺพคจฺฉสญฺญาย อรญฺเญ อาคตาคเต สกุเณ คเหตฺวา ชีวิตกปฺปกสฺส สากุณิกสฺเสว ฯ ภุตฺตํ เถยฺเยน ตสฺส ตนฺติ ตสฺสาปิ อนรหนฺตสฺเสว สโต อรหนฺตภาวํ ทสฺเสตฺวา ลทฺธํ โภชนํ ภุญฺชโต ยํ ตํ ภุตฺตํ ตํ ยถา สากุณิกกิตวสฺส นิกจฺจ วญฺเจตฺวา สกุณคฺคหณํ เอวํ มนุสฺเส วญฺเจตฺวา ลทฺธสฺส โภชนสฺส ภุตฺตตฺตา เถยฺเยน ภุตฺตํ

@เชิงอรรถ: ๑. อยํ อติเรโก ขายติ ฯ นาม โหติ ฯ อิมํ ปน อตฺถวสํ อชานนฺตา เย เอวํ ภุญฺชนฺติ กาสาวกณฺฐา ฯเปฯ นิรยํ เต อุปปชฺชเร ฯ กาสาวกณฺฐาติ กาสาเวน เวฐิตกณฺฐา ฯ เอตฺตกเมว อริยทฺธชธารณมตฺตํ เยสํ สามญฺญํ อญฺญํ นตฺถีติ วุตฺตํ โหติ ฯ ภวิสฺสนฺติ โข ปนานนฺท อนาคตมทฺธานํ โคตฺรภุโน กาสาวกณฺฐาติ เอวํ วุตฺตทุสฺสีลานํ เอตํ อธิวจนํ ฯ ปาปธมฺมาติ ลามกธมฺมา ฯ อสญฺญตาติ กายาทีหิ อสญฺญตา ฯ ปาปาติ ลามกปุคฺคลา ฯ ปาเปหิ กมฺเมหีติ เตหิ กรณกาเล อาทีนวํ อทิสฺวา กเตหิ ปรวญฺจนาทีหิ ปาปกมฺเมหิ ฯ นิรยนฺเต อุปปชฺชเรติ นิรสฺสาทํ ทุคฺคตึ เต อุปปชฺชนฺติ ฯ ตสฺมา เสยฺโย อโยคุโฬติ คาถา ฯ ตสฺสตฺโถ ๑- สจายํ ทุสฺสีโล อสญฺญโต อิจฺฉาจาเร ฐิโต กุหนาย โลกวญฺจโก ปุคฺคโล ตตฺตํ อคฺคิสิขูปมํ อโยคุฬํ ภุญฺเชยฺย อชฺโฌหเรยฺย ตสฺส ยญฺเจตํ รฏฺฐปิณฺฑํ ภุญฺเชยฺย ยญฺเจตํ อโยคุฬํ เตสุ ทฺวีสุ อโยคุโฬว ภุตฺโต เสยฺโย สุนฺทรตโร ปณีตตโร จ ภเวยฺย น หิ อโยคุฬสฺส ภุตฺตตฺตา สมฺปราเย สพฺพญฺญุตญฺญาเณนาปิ ทุชฺชานปริจฺเฉทํ ทุกฺขํ อนุภวติ เอวํ ปฏิลทฺธสฺส ปน รฏฺฐปิณฺฑสฺส ภุตฺตตฺตา สมฺปราเย วุตฺตปฺปการํ ทุกฺขํ อนุโภติ อยํ หิ โกฏิปฺปตฺโต มิจฺฉาชีโวติ ฯ