{๑๒๒} อิทานิ ตตฺถ ตตฺถ ฐานา จาวนวเสน วุตฺตสฺส อทินฺนาทานสฺส องฺคญฺจ วตฺถุเภเทน จ อาปตฺติเภทํ ทสฺเสนฺโต ปญฺจหากาเรหีติ- อาทิมาห ฯ ตตฺถ ปญฺจหากาเรหีติ ปญฺจหิ การเณหิ ฯ ปญฺจองฺเคหีติ วุตฺตํ โหติ ฯ ตตฺรายํ สงฺเขปตฺโถ อทินฺนํ อาทิยนฺตสฺส ปรปริคคหิตญฺจ โหตีติอาทินา นเยน วุตฺเตหิ ปญฺจหากาเรหิ ปาราชิกํ โหติ น ตโต อูเนหีติ ฯ ตตฺริเม ปญฺจ อาการา ปรปริคฺคหิตํ ปรปริคฺคหิตสญฺญา ปริกฺขารสฺส ครุกภาโว เถยฺยจิตฺตํ ฐานา จาวนนฺติ ฯ อิโต ปเรหิ ปน ทฺวีหิ วาเรหิ ลหุเก ปริกฺขาเร วตฺถุเภเทน ถุลฺลจฺจยญฺจ ทุกฺกฏญฺจ ทสฺสิตํ ฯ {๑๒๕} ฉหากาเรหีติอาทินา นเยน วุตฺตวารตฺตเยปิ น สกสญฺญิตา น วิสฺสาสคฺคาหิตา น ตาวกาลิกตา ปริกฺขารสฺส ครุกภาโว เถยฺยจิตฺตํ ฐานา จาวนนฺติ เอวํ ฉ อาการา เวทิตพฺพา ฯ วตฺถุเภเทน ปเนตฺถาปิ ปฐมวาเร ปาราชิกํ ทุติยตติเยสุ ถุลฺลจฺจยทุกฺกฏานิ วุตฺตานิ ฯ ตโต ปเรสุ ปน ตีสุ วาเรสุ วิชฺชมาเนปิ วตฺถุเภเท วตฺถุสฺส ปเรหิ อปริคฺคหิตตฺตา ทุกฺกฏเมว วุตฺตํ ฯ ตตฺร ยเทตํ น จ ปรปริคฺคหิตนฺติ วุตฺตํ ตํ อนชฺฌาวตฺถุกํ วา โหตุ ฉฑฺฑิตํ ฉินฺนมูลกํ อสฺสามิกํ วตฺถุ อตฺตโน สนฺตกํ วา อุภยมฺปิ น จ ปรปริคฺคหิตนฺเตฺวว สงฺขฺยํ คจฺฉติ ฯ ยสฺมา ปเนตฺถ ปรปริคฺคหิตสญฺญา จ อตฺถิ เถยฺยจิตฺเตน จ คหิตํ ตสฺมา อนาปตฺติ น วุตฺตาติ ฯ