{๗} ปุน พฺราหฺมโณ ชิคุจฺฉติ มญฺเญ สมโณ โคตโม อิทํ วโยวุฑฺฒานํ อภิวาทนาทิกุลสมุทาจารกมฺมนฺเตน น ตํ กโรตีติ มญฺญมาโน ภควนฺตํ เชคุจฺฉีติ อาห ฯ ภควา ปน ยสฺมา ชิคุจฺฉติ กายทุจฺจริตาทีหิ ฯ กึ วุตฺตํ โหติ ฯ ยญฺจ ติวิธํ กายทุจฺจริตํ ยญฺจ จตุพฺพิธํ วจีทุจฺจริตํ ยญฺจ ติวิธํ มโนทุจฺจริตํ ยา จ ฐเปตฺวา ตานิ ทุจฺจริตานิ อวเสสานํ ลามกฏฺเฐน ปาปกานํ อโกสลฺลสมฺภูตฏฺเฐน อกุสลานํ ธมฺมานํ สมาปตฺติ สมาปชฺชนา สมงฺคิภาโว ตํ สพฺพมฺปิ คูถํ วิย มณฺฑนกชาติโย ปุริโส ชิคุจฺฉติ หิริยติ ฯ ตสฺมา ตํ เชคุจฺฉิตํ อตฺตนิ สมฺปสฺสมาโน อปรํ ปริยายํ อนุชานาติ ตตฺถ กายทุจฺจริเตนาติ อุปโยคตฺเถ กรณวจนํ ทฏฺฐพฺพํ ฯ {๘} ปุน พฺราหฺมโณ ตเมว อภิวาทนาทิกมฺมํ ภควติ อปสฺสนฺโต อยํ อิมํ โลกเชฏฺฐกกมฺมํ วิเนติ วินาเสติ อถวา ยสฺมา เอตํ สามีจิกมฺมํ น กโรติ ตสฺมา อยํ วิเนตพฺโพ นิคฺคณฺหิตพฺโพติ มญฺญมาโน ภควนฺตํ เวนยิโกติ อาห ฯ ตตฺรายํ ปทตฺโถ ฯ วินยตีติ วินโย วินาเสตีติ วุตฺตํ โหติ ฯ วินโยเอว เวนยิโก ฯ วินยํ วา อรหตีติ เวนยิโก ฯ นิคฺคหํ อรหตีติ วุตฺตํ โหติ ฯ ภควา ปน ยสฺมา ราคาทีนํ วินยาย วูปสมาย ธมฺมํ เทเสติ ตสฺมา เวนยิโก โหติ ฯ อยเมว เอตฺถ ปทตฺโถ ฯ วินยาย ธมฺมํ เทเสตีติ เวนยิโก ฯ วิจิตฺรา หิ ตทฺธิตวุตฺติ ฯ สฺวายนฺตํ เวนยิกภาวํ อตฺตนิ สมฺปสฺสมาโน อปรํ ปริยายํ อนุชานาติ ฯ {๙} ปุน พฺราหฺมโณ ยสฺมา อภิวาทนาทีนิ สามีจิกมฺมานิ กโรนฺตา วโยวุฑฺเฒ โตเสนฺติ หาเสนฺติ อกโรนฺตา ปน ตาเปนฺติ วิเหเสนฺติ โทมนสฺสํ เนสํ อุปฺปาเทนฺติ ภควา จ ตานิ น กโรติ ตสฺมา อยํ วโยวุฑฺเฒ ตปฺปตีติ มญฺญมาโน สปฺปุริสาจารวิรหิตตฺตา วา กปณปุริโส อยนฺติ มญฺญมาโน ภควนฺตํ ตปสฺสีติ อาห ฯ ตตฺรายํ ปทตฺโถ ฯ ตปตีติ ตโป โรเสติ วิเหเสตีติ วุตฺตํ โหติ ฯ สามีจิกมฺมากรณสฺเสตํ นามํ ฯ ตโป อสฺส อตฺถีติ ตปสฺสี ฯ ทุติเย อตฺถวิกปฺเป พฺยญฺชนานิ อวิจาเรตฺวา โลเก กปณปุริโส ตปสฺสีติ วุจฺจติ ฯ ภควา ปน เย อกุสลา ธมฺมา โลกํ ตปนโต ตปนียาติ วุจฺจนฺติ เตสํ ปหีนตฺตา ยสฺมา ตปสฺสีติ สงฺขํ คโต ตสฺมา ตํ ตปสฺสิตํ อตฺตนิ สมฺปสฺสมาโน อปรํ ปริยายํ อนุชานาติ ฯ ตตฺรายํ ปทตฺโถ ฯ ตปนฺตีติ ตปา ฯ อกุสลานํ ธมฺมานเมตํ อธิวจนํ ฯ วุตฺตมฺปิ เหตํ อิธ ตปฺปติ เปจฺจ ตปฺปตีติ คาถายํ ฯ เต ตเป อสฺสิ นิรสฺสิ ปหาสิ วิทฺธํเสสีติ ตปสฺสี ฯ