ติจีวรญฺจ ปตฺโต จ วาสี สูจิ จ พนฺธนํ

ปริสฺสาวเนนฏฺเฐเต ยุตฺตโยคสฺส ภิกฺขุโนติ เอวํ วุตฺเตหิ อฏฺฐหิ ปริกฺขาเรหิ สรีเร ปฏิมุกฺเกหิเยว วสฺสสติกตฺเถโร วิย อิริยาปถสมฺปนฺโน พุทฺธาจริยโก พุทฺธูปชฺฌายโก สมฺมาสมฺพุทฺธํ วนฺทมาโนเยว ติฏฺฐติ ฯ ภควา หิ ปฐมโพธิยํ เอกสฺมึ กาเล เอหิภิกฺขุอุปสมฺปทายเอว อุปสมฺปาเทติ ฯ เอวํ อุปสมฺปนฺนานิ จ สหสฺสูปริ เอกจตฺตาฬีสุตฺตรานิ ตีณิ ภิกฺขุสตานิ อเหสุํ ฯ เสยฺยถีทํ ฯ ปญฺจ ปญฺจวคฺคิยตฺเถรา ยโส กุลปุตฺโต ตสฺส ปริวารา จตุปฺปณฺณาส สหายกา ตึสภทฺทวคฺคิยา สหสฺสปุราณชฏิลา สทฺธึ ทฺวีหิ อคฺคสาวเกหิ อฑฺฒเตยฺยสตา ปริพฺพาชกา เอโก องฺคุลิมาลตฺเถโรติ ฯ วุตฺตญฺเจตํ อฏฺฐกถายํ

ตีณิ สตํ สหสฺสญฺจ จตฺตาฬีสํ ปุนาปเร

เอโก จ เถโร สปฺปญฺโญ สพฺเพ เต เอหิภิกฺขุกาติ ฯ น เกวลญฺจ เอเต อญฺเญปิ พหู สนฺติ ฯ เสยฺยถีทํ ฯ ติสตปริวาโร เสโล พฺราหฺมโณ สหสฺสปริวาโร มหากปฺปิโน ทสสหสฺสา กปิลวตฺถุวาสิโน กุลปุตฺตา โสฬสสหสฺสา ปารายนิกพฺราหฺมณาติเอวมาทโย ฯ เต ปน วินยปิฏเก ปาลิยํ น นิทฺทิฏฺฐตฺตา น วุตฺตา ฯ อิเม ตตฺถ นิทฺทิฏฺฐตฺตา วุตฺตา ฯ