เย สนฺธาย อิทํ วุตฺตํ อถโข อายสฺมา มหากสฺสโป เอเกนูนปญฺจ- อรหนฺตสตานิ อุจฺจินีติ ฯ กิสฺส ปน เถโร เอเกนูนมกาสีติ ฯ อายสฺมโต อานนฺทตฺเถรสฺส โอกาสกรณตฺถํ ฯ เตน หายสฺมตา สหาปิ วินาปิ น สกฺกา ธมฺมสงฺคีติ กาตุํ ฯ โส หายสฺมา เสกฺโข สกรณีโย ตสฺมา สห น สกฺกา ฯ ยสฺมา ปนสฺส กิญฺจิ ทสพลเทสิตํ สุตฺตเคยฺยาทิกํ ภควโต อสมฺมุขาปฏิคฺคหิตํ นาม นตฺถิ ตสฺมา วินา น สกฺกา ฯ ยทิ เอวํ เสกฺโขปิ สมาโน ธมฺมสงฺคีติยา พหุการตฺตา เถเรน อุจฺจินิตพฺโพ อสฺส อถ กสฺมา น อุจฺจินิโตติ ฯ ปรูปวาทํ วิวชฺชนโต ฯ เถโร หิ อายสฺมนฺเต อานนฺเท อติวิย วิสฺสตฺโถ อโหสิ ฯ ตถาหิ นํ สิรสฺมึ ปลิเตสุ ชาเตสุปิ น วายํ กุมารโก มตฺตมญฺญาสีติ ๑- กุมารกวาเทน วทติ ฯ สกฺยกุลปฺปสูโต จายมายสฺมา อานนฺโท ตถาคตสฺส ภาตา จูฬปิตุปุตฺโต ตตฺร หิ ภิกฺขู ฉนฺทาคมนํ วิย มญฺญมานา พหู อเสกฺขปฏิสมฺภิทปฺปตฺเต ภิกฺขู ฐเปตฺวา อานนฺทํ เสกฺขปฏิสมฺภิทปฺปตฺตํ เถโร อุจฺจินีติ อุปวเทยฺยุํ ตํ ปรูปวาทํ ปริวชฺเชนฺโต อานนฺทํ วินา สงฺคีติ น สกฺกา กาตุํ ภิกฺขูนํเยว อนุมติยา คเหสฺสามีติ ตํ น อุจฺจินิ ฯ อถ สยเมว ภิกฺขู อานนฺทสฺสตฺถาย เถรํ ยาจึสุ ฯ

ภิกฺขู อายสฺมนฺตํ มหากสฺสปํ เอตทโวจุํ อยํ ภนฺเต อายสฺมา อานนฺโท กิญฺจาปิ เสกฺโข อภพฺโพ ฉนฺทา โทสา โมหา ภยา อคตึ คนฺตุํ พหุ จาเนน ภควโต สนฺติเก ธมฺโม จ วินโย จ ปริยตฺโต เตนหิ ภนฺเต เถโร อายสฺมนฺตํปิ อานนฺทํ อุจฺจินตูติ ฯ อถโข อายสฺมา มหากสฺสโป อายสฺมนฺตํปิ อานนฺทํ อุจฺจินิ ฯ เอวํ ภิกฺขูนํ อนุมติยา อุจฺจินิเตน เตนายสฺมตา สทฺธึ ปญฺจ เถรสตานิ อเหสุํ ฯ อถโข เถรานํ ภิกฺขูนํ เอตทโหสิ กตฺถ นุโข มยํ ธมฺมญฺจ วินยญฺจ สงฺคาเยยฺยามาติ ฯ อถโข เถรานํ ภิกฺขูนํ เอตทโหสิ ราชคหํ โข มหาโคจรํ ปหุตเสนาสนํ ยนฺนูน มยํ ราชคเห วสฺสํ วสนฺตา ธมฺมญฺจ วินยญฺจ สงฺคาเยยฺยาม น อญฺเญ ภิกฺขู ราชคเห วสฺสํ อุปคจฺเฉยฺยุนฺติ ฯ กสฺมา ปน เนสํ เอตทโหสิ ฯ อิทํ อมฺหากํ ถาวรกมฺมํ โกจิ วิสภาคปุคฺคโล สงฺฆมชฺฌํ ปวิสิตฺวา อุกฺโกเฏยฺยาติ ฯ อถายสฺมา มหากสฺสโป ญตฺติทุติเยน กมฺเมน สาเวสิ ฯ ตํ สงฺคีติกฺขนฺธเก ๑- วุตฺตนเยเนว ญาตพฺพํ ฯ