ตตฺรายํ ปาลิมุตฺตโก กปฺปิยากปฺปิยปริกฺขารวินิจฺฉโย ฯ เกจิ ตาลปณฺณจฺฉตฺตํ อนฺโต วา พหิ วา ปญฺจวณฺเณน สุตฺเตน สิพฺเพตฺวา วณฺณมฏฺฐํ กโรนฺติ ตํ น วฏฺฏติ ฯ เอกวณฺเณน ปน นีเลน วา ปีเตน วา เยน เกนจิ สุตฺเตน อนฺโต วา พหิ วา สิพฺพิตุํ ฉตฺตทณฺฑคฺคาหณกํ สลากปญฺชรํ วา วินทฺธิตุํ วฏฺฏติ ฯ ตญฺจ โข ถิรกรณตฺถํ น วณฺณมฏฺฐตฺถาย ฯ ฉตฺตปณฺเณสุ มกรทนฺตกํ วา อฑฺฒจนฺทกํ วา ฉินฺทิตุํ น วฏฺฏติ ฯ ฉตฺตทณฺเฑ เคหตฺถมฺเภสุ วิย ฆฏโก วา พาฬรูปกํ วา น วฏฺฏติ ฯ สเจปิ สพฺพตฺถ อารคฺเคน เลขา ทินฺนา โหติ สาปิ น วฏฺฏติ ฯ ฆฏกมฺปิ พาฬรูปกมฺปิ ภินฺทิตฺวา ธาเรตพฺพํ ฯ เลขาปิ ฆํสิตฺวา วา อปเนตพฺพา สุตฺตเกน วา ทณฺโฑ เวเฐตพฺโพ ฯ ทณฺฑพุนฺเธ ปน อหิจฺฉตฺตกสณฺฐานํ วฏฺฏติ ฯ วาตปฺปหาเรน อจลนตฺถํ ฉตฺตมณฺฑลิกํ รชฺชุเกหิ คาเหตฺวา ทณฺเฑ พนฺธนฺติ ฯ ตสฺมึ พนฺธนฏฺฐาเน วาลยมิว อุกฺกีริตฺวา เลขํ ฐเปนฺติ สา วฏฺฏติ ฯ จีวรมณฺฑนตฺถาย นานาสุตฺตเกหิ สตปทีสทิสํ สิพฺพนฺตา อาคนฺตุกปฏํ ฐเปนฺติ อญฺญมฺปิ ยงฺกิญฺจิ สูจิกมฺมวิการํ กโรนฺติ ปฏมุเข วา ปริยนฺเต วา เวณึ วา สงฺขลิกํ วา เอวมาทิ สพฺพํ น วฏฺฏติ ฯ ปกติสูจิกมฺมเมว วฏฺฏติ ฯ คณฺฐิกปฏกญฺจ ปาสกปฏกญฺจ อฏฺฐโกณมฺปิ โสฬสโกณมฺปิ กโรนฺติ ตตฺถ อคฺฆิยคยมุคฺคราทีนิ ทสฺเสนฺติ กกฺกฏกกฺขีนิ อุกฺกีรนฺติ สพฺพํ น วฏฺฏติ ฯ จตุกฺโกณเมว วฏฺฏติ ฯ โกณสุตฺตกปิฬกาว จีวเร รตฺเต ทูวิญฺเญยฺยรูปา วฏฺฏนฺติ ฯ กญชิกปิฏฺฐขลิอาทีสุ จีวรํ ปกฺขิปิตุํ น วฏฺฏติ ฯ จีวรกมฺมกาเล ปน หตฺถมลสูจิมลาทีนํ โธวนตฺถํ กิลิฏฺฐกาเล จ โธวนตฺถํ วฏฺฏติ ฯ คนฺธํ วา ลาขํ วา เตลํ วา รชเน ปกฺขิปิตุํ น วุฏฺฏติ ฯ จีวรํ รชิตฺวา สงฺเขน วา มณินา วา เยน เกนจิ น ฆฏฺเฏตพฺพํ ฯ ภูมิยํ ชานุกานิ นิหนฺตฺวา หตฺเถหิ คเหตฺวา โทณิยมฺปิ น ฆํสิตพฺพํ ฯ โทณิยํ วา ผลเก วา ฐเปตฺวา อนฺเต คาหาเปตฺวา หตฺเถน ปหริตุํ ปน วฏฺฏติ ฯ ตมฺปิ มุฏฺฐินา น กาตพฺพํ ฯ โปราณกตฺเถรา ปน โทณิยมฺปิ น ฐเปสุํ เอโก หตฺเถน คเหตฺวา ติฏฺฐติ อปโร หตฺเถ กตฺวา หตฺเถน ปหรติ ฯ จีวรสฺส กณฺณสุตฺตกํ น วฏฺฏติ ฯ รชิตกาเล ฉินฺทิตพฺพํ ฯ ยํ ปน อนุชานามิ ภิกฺขเว กณฺณสุตฺตกนฺติ เอวํ อนุญฺญาตํ ตํ อนุวาเต ปาสกํ กตฺวา พนฺธิตพฺพํ รชนกาเล ลคฺคนตฺถาย ฯ คณฺฐิเกปิ โสภากรณตฺถํ เลขา วา ปิฬกา วา น วฏฺฏติ นาเสตฺวา ปริภุญฺชิตพฺพํ ฯ ปตฺเต วา ถาลเก วา อารคฺเคน เลขํ กโรนฺติ อนฺโต วา พหิ วา น วฏฺฏติ ฯ ปตฺตํ ภมํ อาโรเปตฺวา มชฺชิตฺวา ปจนฺติ มณิวณฺณํ กริสฺสามาติ น วฏฺฏติ ฯ เตลวณฺโณ ปน วฏฺฏติ ฯ ปตฺตมณฺฑเล ภตฺติกมฺมํ น วฏฺฏติ ฯ มกรทนฺตกํ ปน วฏฺฏติ ฯ ธมกรกจฺฉตฺตกสฺส อุปริ วา เหฏฺฐา วา ธมกรกกุจฺฉิยํ วา เลขา น วฏฺฏติ ฯ ฉตฺตมุขวฏฺฏิยํ ปนสฺส เลขา วฏฺฏติ ฯ กายพนฺธนสฺส โสภนตฺถํ ตหึ ตหึ ทิคุณํ สุตฺตํ โกฏฺเฏนฺติ กกฺกฏกกฺขีนิ อุฏฺฐเปนฺติ น วฏฺฏติ ฯ อุโภสุ ปน อนฺเตสุ ทสามุขสฺส ถิรภาวาย ทิคุณํ โกฏฺเฏตุํ วฏฺฏติ ฯ ทสามุเข ปน ฆฏกํ วา มกรมุขํ วา เทฑฺฑุภสีสํ วา ยงฺกิญฺจิ วิการรูปํ กาตุํ น วฏฺฏติ ฯ ตตฺถ ตตฺถ อจฺฉีนิ ทสฺเสตฺวา มาลากมฺมาทีนิ วา กตฺวา โกฏฺฏิตกายพนฺธนํปิ น วฏฺฏติ ฯ อุชุกเมว ปน มจฺฉกณฺฏกํ วา ขชฺชูรีปตฺตกํ วา มฏฺฐปฏิกํ วา กตฺวา โกฏฺฏิตุํ วฏฺฏติ ฯ กายพนฺธนสฺส ทสา เอกา วฏฺฏติ เทฺว ตีณิ จตฺตาริปิ วฏฺฏนฺติ ฯ ตโต ปรํ น วฏฺฏนฺติ ฯ รชฺชุกกายพนฺธนํ เอกเมว วฏฺฏติ ฯ ปามงฺคสณฺฐานํ ปน เอกมฺปิ น วฏฺฏติ ฯ ทสา ปน ปามงฺคสณฺฐานาปิ วฏฺฏติ ฯ พหู รชฺชุเก เอกโต กตฺวา เอเกน นิรนฺตรํ เวเฐตฺวา กตํ พหุรชฺชุกนฺติ น วตฺตพฺพํ ตํ วฏฺฏติ ฯ กายพนฺธนวิเถ อฏฺฐมงฺคลาทิกํ ยงฺกิญฺจิ วิการรูปํ น วฏฺฏติ ฯ ปริจฺเฉทเลขามตฺตํ วฏฺฏติ ฯ วิถกสฺส อุโภสุ อนฺเตสุ ถิรกรณตฺถาย ฆฏกมฺปิ กโรนฺติ อยมฺปิ วฏฺฏติ ฯ อญฺชนิยํ อิตฺถีปุริสจตุปฺปทสกุณรูปํ วา มาลากมฺมลตากมฺม- มกรทนฺตกโคมุตฺตกอฑฺฒจนฺทกาทิเภทํ วา วิการรูปํ น วฏฺฏติ ฯ ฆํสิตฺวา วา ฉินฺทิตฺวา วา ยถา วา น ปญฺญายติ ตถา สุตฺตเกน เวเฐตฺวา วลญฺเชตพฺพา ฯ อุชุกเมว ปน จตุรสฺสา วา อฏฺฐํสา วา โสฬสํสา วา อญฺชนี วฏฺฏติ ฯ เหฏฺฐโตปิสฺสา เทฺว วา ติสฺโส วา วฏฺฏเลขาโย วฏฺฏนฺติ ฯ คีวายมฺปิสฺสา ปิธานกพนฺธนตฺถํ เอกา วฏฺฏเลขา วฏฺฏติ ฯ อญฺชนีสลากายมฺปิ วณฺณมฏฺฐกมฺมํ น วฏฺฏติ ฯ อญฺชนีถวิกายมฺปิ ยงฺกิญฺจิ นานาวณฺเณน สุตฺเตน วณฺณมฏฺฐกมฺมํ น วฏฺฏติ ฯ เอเสว นโย กุญฺจิกโกสเกปิ ฯ กุญฺจิกาย วณฺณมฏฺฐกมฺมํ น วฏฺฏติ ฯ ตถา สิปาฏิกาย ฯ เอกวณฺณสุตฺเตน ปเนตฺถ เยน เกนจิ ยงฺกิญฺจิ สิพฺพิตุํ วฏฺฏติ ฯ อารกณฺฏเกปิ วฏฺฏมณิกํ วา อญฺญํ วา วณฺณมฏฺฐํ น วฏฺฏติ ฯ คีวายํ ปน ปริจฺเฉทเลขา วฏฺฏติ ฯ ปิปฺผลเกปิ มณิกํ วา ปิฬกํ วา ยงฺกิญฺจิ ฐเปตุํ น วฏฺฏติ ฯ ทณฺฑเก ปน ปริจฺเฉทเลขา วฏฺฏติ ฯ นขจฺเฉทนํ วลิตกํเยว กโรนฺติ ตสฺมา ตํ วฏฺฏติ ฯ อุตฺตรารณิยํ วา อรณิยํ วา ธนุเก วา อุปริเปลฺลนทณฺฑเก วา มาลากมฺมาทิกํ ยงฺกิญฺจิ วณฺณมฏฺฐํ น วฏฺฏติ ฯเปลฺลนทณฺฑกสฺส ปน เวมชฺเฌ มณฺฑลํ โหติ ตตฺถ ปริจฺเฉทเลขามตฺตํ วฏฺฏติ ฯ สูจิสณฺฑาสํ กโรนฺติ เยน สูจึ ฑํสาเปตฺวา ฆํสนฺติ ฯ ตตฺถ มกรมุขาทิกํ ยงฺกิญฺจิ วณฺณมฏฺฐํ น วฏฺฏติ ฯ สูจิฑํสนตฺถํ ปน มุขมตฺตํ โหติ ตํ วฏฺฏติ ฯ ทนฺตกฏฺฐจฺเฉทนวาสิยมฺปิ ยงฺกิญฺจิ วณฺณมฏฺฐํ น วฏฺฏติ ฯ อุชุกเมว กปฺปิยโลเหน อุโภสุ วา ปสฺเสสุ จตุรสฺสํ วา อฏฺฐํสํ วา พนฺธิตุํ วฏฺฏติ ฯ กตฺตรทณฺเฑปิ ยงฺกิญฺจิ วณฺณมฏฺฐํ น วฏฺฏติ ฯ เหฏฺฐา เอกา วา เทฺว วา วฏฺฏเลขา อุปริ อหิจฺฉตฺตกมกุลมตฺตญฺจ วฏฺฏติ ฯ เตลภาชเนสุ วิสาเณ นาฬิยํ วา อลาพุเก วา อามณฺฑสารเก วา ฐเปตฺวา อิตฺถีรูปํ ปุริสรูปญฺจ อวเสสํ สพฺพมฺปิ วณฺณมฏฺฐกมฺมํ วฏฺฏติ ฯ มญฺจปีเฐ ภิสีพิมฺโพหเน ภุมฺมตฺถรเณ ปาทปุญฺฉเน จงฺกมนภิสิยํ สมฺมุญฺชนิยํ กจวรฉฑฺฑนเก รชนโทณิกาย ปานียอุฬุงฺเก ปานียฆเฏ ปาทกฏฺฐลิกาย ผลกปีฐเก วลยาธารเก ทณฺฑาธารเก ปตฺตปิธาเน ตาลวณฺเฏ จ วีชเน เอเตสุ สพฺพํ มาลากมฺมาทิวณฺณมฏฺฐกมฺมํ วฏฺฏติ ฯ เสนาสเน ปน ทฺวารกวาฏวาตปานกวาฏาทีสุ สพฺพรตนมยมฺปิ วณฺณมฏฺฐกมฺมํ วฏฺฏติ ฯ เสนาสเน กิญฺจิ ปฏิเสเธตพฺพํ นตฺถิ อญฺญตฺร วิรุทฺธเสนาสนา ฯ วิรุทฺธเสนาสนนฺนาม อญฺเญสํ สีมาย ราชวลฺลเภหิ กตํ เสนาสนํ วุจฺจติ ฯ ตสฺมา เย ตาทิสํ เสนาสนํ กโรนฺติ เต วตฺตพฺพา มา อมฺหากํ สีมาย เสนาสนํ กโรถาติ ฯ อนาทิยิตฺวา กโรนฺติเยว ฯ ปุนปิ วตฺตพฺพา มา เอวํ อกตฺถ มา อมฺหากํ อุโปสถปฺปวารณานํ อนฺตรายมกตฺถ มา สามคฺคึ ภินฺทิตฺถ ตุมฺหากํ เสนาสนํ กตมฺปิ กตฏฺฐาเน น ฐสฺสตีติ ฯ สเจ พลกฺกาเรน กโรนฺติเยว ยทา เตสํ ลชฺชิปริสา อุสฺสนฺนา โหติ สกฺกา โหติ ลทฺธุํ ธมฺมิโก วินิจฺฉโย ตทา เตสํ เปเสตพฺพํ ตุมฺหากํ อาวาสํ หรถาติ ฯ สเจ ยาวตติยํ เปสิเต หรนฺติ สาธุ โน เจ หรนฺติ ฐเปตฺวา โพธิญฺจ เจติยญฺจ อวเสสเสนาสนานิ ภินฺทิตพฺพานิ โน จ โข อปริโภคํ กโรนฺเตหิ ฯ ปฏิปาฏิยา ปน ฉทนโคปานสีอิฏฺฐกาทีนิ อปเนตฺวา เตสํ เปเสตพฺพํ ตุมฺหากํ ทพฺพสมฺภาเร หรถาติ ฯ สเจ หรนฺติ สาธุ โน เจ หรนฺติ อถ เตสุ สมฺภาเรสุ หิมวสฺสาตปาทีหิ ปูติภูเตสุ วา โจเรหิ วา หเฏสุ อคฺคินา วา ทฑฺเฒสุ สีมสามิกา ภิกฺขู อนุปวชฺชา น ลพฺภา โจเทตุํ ตุมฺเหหิ อมฺหากํ ทพฺพสมฺภารา นาสิตาติ วา ตุมฺหากํ คีวาติ วา ฯ ยํ ปน สีมสามิเกหิ ภิกฺขูหิ กตํ ตํ สุกตเมว โหตีติ ฯ