เอวํ วตฺถุ โอโลเกตพฺพํ ฯ

กาโลติ อวหารกาโล ฯ ตเทว หิ ภณฺฑํ กทาจิ สมคฺฆํ โหติ กทาจิ มหคฺฆํ ฯ ตสฺมา ตํ ภณฺฑํ ยสฺมึ กาเล อวหฏํ ตสฺมึเยว กาเล โย ตสฺส อคฺโฆ โหติ เตน อคฺเฆน อาปตฺติ กาเรตพฺพา ฯ เอวํ กาโล โอโลเกตพฺโพ ฯ

เทโสติ อวหารเทโส ฯ ตํ หิ ภณฺฑํ ยสฺมึ เทเส อวหฏํ ตสฺมึเยว เทเส โย ตสฺส อคฺโฆ โหติ เตน อคฺเฆน อาปตฺติ กาเรตพฺพา ฯ ภณฺฑฏฺฐานเทเส หิ ภณฺฑํ สมคฺฆํ โหติ อญฺญตฺถ มหคฺฆํ โหติ ฯ

อิมสฺสาปิ จ อตฺถสฺส ทีปนตฺถมิทํ วตฺถุ ฯ อนฺตรสมุทฺเท กิร เอโก ภิกฺขุ สุสณฺฐานํ นาฬิเกรํ ลภิตฺวา ภมํ อาโรเปตฺวา สงฺขถาลกสทิสํ มโนรมํ ปานียถาลกํ กตฺวา ตตฺเถว ฐเปตฺวา เจติยคิรึ อคมาสิ ฯ อถญฺโญ ภิกฺขุ อนฺตรสมุทฺทํ คนฺตฺวา ตสฺมึ วิหาเร ปฏิวสนฺโต ตํ ถาลกํ ทิสฺวา เถยฺยจิตฺเตน คเหตฺวา เจติยคิริเมว อาคโต ฯ ตสฺส ตตฺถ ยาคุํ ปิวนฺตสฺส ตํ ถาลกํ ทิสฺวา ถาลกสฺสามิโก ภิกฺขุ อาห กุโต เต อิทํ ลทฺธนฺติ ฯ อนฺตรสมุทฺทโต เม อานีตนฺติ ฯ โส เนตํ ตว สนฺตกํ เถยฺยาย เต คหิตนฺติ สงฺฆมชฺฌํ อากฑฺฒิ ฯ ตตฺถ วินิจฺฉยํ อลภิตฺวา มหาวิหารํ อาคมึสุ ฯ ตตฺถ เภรึ ปหราเปตฺวา มหาเจติยสมีเป สนฺนิปาตํ กตฺวา วินิจฺฉยํ อารภึสุ ฯ วินยธรตฺเถรา อวหารํ ปญฺญาเปสุํ ฯ ตสฺมิญฺจ สนฺนิปาเต อาภิธมฺมิกโคทตฺตตฺเถโร นาม วินยกุสโล โหติ ฯ โส เอวมาห อิมินา อิทํ ถาลกํ กุหึ อวหฏนฺติ ฯ อนฺตรสมุทฺเท อวหฏนฺติ ฯ ตตฺรีทํ กึ อคฺฆตีติ ฯ น กิญฺจิ อคฺฆติ ฯ ตตฺร หิ นาฬิเกรํ ภินฺทิตฺวา มิญฺชํ ขาทิตฺวา กปาลํ ฉฑฺเฑนฺติ ทารุอตฺถํ ปน ผรตีติ ฯ อิมสฺส ภิกฺขุโน เอตฺถ หตฺถกมฺมํ กึ อคฺฆตีติ ฯ มาสกํ วา อูนมาสกํ วาติ ฯ อตฺถิ ปน กตฺถจิ สมฺมาสมฺพุทฺเธน มาสเก วา อูนมาสเก วา ปาราชิกํ ปญฺญตฺตนฺติ ฯ เอวํ วุตฺเต สาธุ สาธุ สุกถิตํ สุวินิจฺฉิตนฺติ เอกสาธุกาโร อโหสิ ฯ เตน จ สมเยน ภาติยราชาปิ เจติยวนฺทนตฺถํ นครโต นิกฺขนฺโต ตํ สทฺทํ สุตฺวา กึ อิทนฺติ ปุจฺฉิตฺวา สพฺพํ ปฏิปาฏิยา สุตฺวา นคเร เภริญฺจาราเปสิ มยิ สนฺเต ภิกฺขูนมฺปิ ภิกฺขุนีนมฺปิ คิหีนมฺปิ อธิกรณํ อาภิธมฺมิกโคทตฺตตฺเถเรน วินิจฺฉิตํ สุวินิจฺฉิตํ ตสฺส วินิจฺฉเย อติฏฺฐมานํ ราชาณาย ฐเปมีติ ฯ