ปญฺจนิกายา นาม ทีฆนิกาโย มชฺฌิมนิกาโย สํยุตฺตนิกาโย องฺคุตฺตรนิกาโย ขุทฺทกนิกาโยติ ฯ ตตฺถ ขุทฺทกนิกาโย นาม จตฺตาโร นิกาเย ฐเปตฺวา อวเสสํ พุทฺธวจนํ ฯ ตตฺถ วินโย อายสฺมตา อุปาลิตฺเถเรน วิสชฺชิโต ฯ เสโส ขุทฺทกนิกาโย จตฺตาโร จ นิกายา อานนฺทตฺเถเรน ฯ

ตเทตํ สพฺพมฺปิ พุทฺธวจนํ รสวเสน เอกวิธํ ธมฺมวินยวเสน ทุวิธํ โหติ ปฐมมชฺฌิมปจฺฉิมวเสน ติวิธํ ตถา ปิฏกวเสน นิกายวเสน ปญฺจวิธํ องฺควเสน นววิธํ ธมฺมกฺขนฺธวเสน จตุราสีติสหสฺสวิธนฺติ เวทิตพฺพํ ฯ

กถํ รสวเสน เอกวิธํ ฯ ยํ หิ ภควตา อนุตฺตรํ สมฺมาสมฺโพธึ อภิสมฺพุชฺฌิตฺวา ยาว อนุปาทิเสสาย นิพฺพานธาตุยา ปรินิพฺพายนฺเตน เอตฺถนฺตเร จตฺตาฬีสวสฺสานิ เทวมนุสฺสนาคยกฺขาทโย อนุสาสนฺเตน ปจฺจเวกฺขนฺเตน วา วุตฺตํ สพฺพนฺตํ เอกรสํ วิมุตฺติรสเมว โหติ ฯ เอวํ รสวเสน เอกวิธํ ฯ

กถํ ธมฺมวินยวเสน ทุวิธํ ฯ สพฺพเมว เจตํ ธมฺโม เจว วินโย จาติ สงฺขฺยํ คจฺฉติ ฯ ตตฺถ วินยปิฏกํ วินโย ฯ อวเสสํ พุทฺธวจนํ ธมฺโม ฯ เตเนวาห ยนฺนูน มยํ อาวุโส ธมฺมญฺจ วินยญฺจ สงฺคาเยยฺยาม อหํ อุปาลึ วินยํ ปุจฺเฉยฺยํ อานนฺทํ ธมฺมํ ปุจฺเฉยฺยนฺติ จ ฯ เอวํ ธมฺมวินยวเสน ทุวิธํ ฯ