{๑๔๒-๑๔๓} โอทนิยฆราทิวตฺถูสุ ฯ โอทนิยฆรนฺนาม วิกฺกายิกภตฺตปจนฆรํ ฯ สูนาฆรนฺนาม วิกฺกายิกมํสปจนฆรํ ฯ ปูวฆรนฺนาม วิกฺกายิกขชฺชกปจนฆรํ ฯ เสสเมตฺถ ปริกฺขารวตฺถูสุ ปากฏเมว ฯ {๑๔๔} ปีฐวตฺถุสฺมึ ฯ โส ภิกฺขุ ปริกปฺเปตฺวา เอตํ ฐานํ สมฺปตฺตํ คณฺหิสฺสามีติ สงฺกาเมติ ฯ เตนสฺส สงฺกมเน อวหาโร นตฺถิ ฯ สงฺกาเมตฺวา ปน ปริกปฺปิโตกาสโต คหเณ ปาราชิกํ วุตฺตํ ฯ เอวํ หรนฺโต จ ยทิ ปีฐเก เถยฺยจิตฺตํ นตฺถิ ถวิกํ อคฺฆาเปตฺวา กาเรตพฺโพ ฯ อถ ปีฐเกปิ อตฺถิ อุโภ อคฺฆาเปตฺวา กาเรตพฺโพ ฯ ภิสีอาทีนิ ตีณิ วตฺถูนิ ปากฏาเนว ฯ {๑๔๖} วิสฺสาสคฺคาหาทีสุ ตีสุ วตฺถูสุ คหเณ อนาปตฺติ อาหราเปนฺเตสุ ภณฺฑเทยฺยํ ฯ ปิณฺฑาย ปวิฏฺฐสฺส ปฏิวิโส อนฺโตอุปจารสีมาย ฐิตสฺเสว คเหตุํ วฏฺฏติ ฯ ยทิ ปน ทายกา พหิอุปจารฏฺฐานมฺปิ ภนฺเต คณฺหาถ อาคนฺตฺวา ปริภุญฺชิสฺสนฺตีติ วทนฺติ เอวํ อนฺโตคามฏฺฐานมฺปิ คเหตุํ วฏฺฏติ ฯ เสสเมตฺถ อุตฺตานตฺถเมว ฯ

{๑๔๘-๑๔๙} สตฺตสุ อมฺพโจราทีสุ วตฺถูสุ ฯ ปํสุกูลสญฺญาย คหเณ อนาปตฺติ อาหราเปนฺเตสุ ภณฺฑเทยฺยํ ฯ เถยฺยจิตฺเตน ปริโภเค ปาราชิกํ ฯ ตตฺรายํ วินิจฺฉโย ฯ สามิกาปิ สาลยา โจราปิ สาลยา ปํสุกูลสญฺญาย ขาทนฺตสฺส ภณฺฑเทยฺยํ ฯ เถยฺยจิตฺเตน คณฺหโต อุทฺธาเรเยว อวหาโร ภณฺฑํ อคฺฆาเปตฺวา กาเรตพฺโพ ฯ สามิกา สาลยา โจรา นิราลยา เอเสว นโย ฯ สามิกา นิราลยา โจรา สาลยา ปุน คณฺหิสฺสามาติ กิสฺมิญฺจิเทว คหนฏฺฐาเน ขิปิตฺวา คตา เอเสว นโย ฯ อุโภ นิราลยา ปํสุกูลสญฺญาย ขาทโต อนาปตฺติ ฯ เถยฺยจิตฺเตน ทุกฺกฏํ ฯ สงฺฆสฺส อมฺพาทีสุ ปน ฯ สงฺฆาราเม ชาตํ วา โหตุ อาเนตฺวา ทินฺนํ วา ปญฺจมาสกํ วา อติเรกปญฺจมาสกํ วา อคฺฆนกํ อวหรนฺตสฺส ปาราชิกํ ฯ ปจฺจนฺเต โจรูปทฺทเวน คาเมสุ วุฏฺฐหนฺเตสุ ภิกฺขู วิหาเร ฉฑฺเฑตฺวา ปุน อาวสนฺเต ชนปเท อาคมิสฺสามาติ สอุสฺสาหาว คจฺฉนฺติ ฯ ภิกฺขู ตาทิสํ วิหารํ ปตฺวา อมฺพปกฺกาทีนิ ฉฑฺฑิตกานีติ ปํสุกูลสญฺญาย ปริภุญฺชนฺติ อนาปตฺติ ฯ เถยฺยจิตฺเตน ปริภุญฺชโต อวหาโร โหติ ภณฺฑํ อคฺฆาเปตฺวา กาเรตพฺโพ ฯ มหาปจฺจริยํ ปน สงฺเขปฏฺฐกถายญฺจ อวิเสเสน วุตฺตํ ฉฑฺฑิตวิหาเร ผลาผลํ เถยฺยจิตฺเตน ปริภุญฺชโต น ปาราชิกํ กสฺมา อาคตาคตานํ สนฺตกตฺตาติ ฯ คณสนฺตเก ปน ปุคฺคลิเก จ สอุสฺสาหมตฺตเมว ปมาณํ ฯ สเจ ปน ตโต อมฺพปกฺกาทึ กุลสงฺคณฺหณตฺถาย เทติ กุลทูสกทุกฺกฏํ ฯ เถยฺยจิตฺเตน เทนฺโต อคฺเฆน กาเรตพฺโพ ฯ สงฺฆิเกปิ เอเสว นโย ฯ เสนาสนตฺถาย นิยมิตํ กุลสงฺคณฺหณตฺถาย ททโต ทุกฺกฏํ อิสฺสรวตาย ถุลฺลจฺจยํ เถยฺยจิตฺเตน ปาราชิกํ ฯ โน เจ วตฺถุ ปโหติ อคฺเฆน กาเรตพฺโพ ฯ พหิอุปจารสีมายํ นิสีทิตฺวา อิสฺสรวตาย ปริภุญฺชโต คีวา ฯ คณฺฑึ ปหริตฺวา กาลํ โฆเสตฺวา มยฺหํ ปาปุณาตีติ ขาทิตํ สุขาทิตํ ฯ คณฺฑึ อปหริตฺวา กาลเมว โฆเสตฺวา คณฺฑิเมว ปหริตฺวา กาลํ อโฆเสตฺวา คณฺฑิมฺปิ อปหริตฺวา กาลมฺปิ อโฆเสตฺวา อญฺเญสํ นตฺถิภาวํ ญตฺวา มยฺหํ ปาปุณาตีติ ขาทิตํปิ สุขาทิตเมว ฯ