มญฺจาทีนิ สตฺต วตฺถูนิ ปากฏาเนว ฯ ปาลิยา ปน อนาคตมฺปิ ปาสาณตฺถมฺภํ วา รุกฺขตฺถมฺภํ วา อญฺญํ วา กิญฺจิ ปาทคฺฆนกํ หรนฺตสฺส ปาราชิกเมว ฯ ปธานฆราทีสุ ฯ ฉฑฺฑิตปติตานํ ปริเวณาทีนํ กุฑฺฑมฺปิ ปาการมฺปิ ภินฺทิตฺวา อิฏฺฐกาทีนิ อวหรนฺตสฺสาปิ เอเสว นโย ฯ กสฺมา ฯ สงฺฆิกนฺนาม กทาจิ อชฺฌาวสนฺติ กทาจิ น อชฺฌาวสนฺติ ฯ ปจฺจนฺเต โจรภเยน ชนปเท วุฏฺฐหนฺเต ฉฑฺฑิตวิหาราทีสุ กญฺจิ ปริกฺขารํ หรนฺตสฺสาปิ เอเสว นโย ฯ เย ปน ตโต ตาวกาลิกํ หรนฺติ ปุน อาวาสิเตสุ จ วิหาเรสุ ภิกฺขู อาหราเปนฺติ ทาตพฺพํ ฯ สเจปิ ตโต อาหริตฺวา เสนาสนํ กตํ โหติ ตํ วา ตทคฺฆนกํ วา ทาตพฺพเมว ฯ ปุน อาวสิสฺสามาติ อาลยํ อจฺฉินฺทิตฺวา วุฏฺฐิเตสุ ชนปเทสุ คณสนฺตกํ วา ปุคฺคลิกํ วา คหิตํ โหติ ฯ เต เจ อนุชานนฺติ ปฏิกมฺเมน กิจฺจํ นตฺถิ ฯ สงฺฆิกํ ปน ครุภณฺฑํ ตสฺมา ปฏิกมฺมํ กตฺตพฺพเมว ฯ

{๑๕๗} วิหารปริโภควตฺถุ อุตฺตานตฺถเมว ฯ อนุชานามิ ภิกฺขเว ตาวกาลิกํ หริตุนฺติ เอตฺถ โย ภิกฺขุ สงฺฆิกํ มญฺจํ วา ปีฐํ วา ตาวกาลิกํ หริตฺวา อตฺตโน ผาสุกฏฺฐาเนสุ เอกมฺปิ เทฺวปิ มาเส สงฺฆปริโภเคน ปริภุญฺชติ อาคตานํ พุฑฺฒตรานํ เทติ น ปฏิพาหติ ตสฺส ตสฺมึ นฏฺเฐปิ ชิณฺเณปิ เถยฺยาย อวหเฏปิ คีวา น โหติ ฯ วสิตฺวา ปน คจฺฉนฺเตน ยถาฐาเน ฐเปตพฺพํ ฯ โย ปน ปุคฺคลิกปริโภเคน ปริภุญฺชติ อาคตาคตานํ พุฑฺฒตรานํ น เทติ ตสฺส คีวา โหติ ฯ อญฺญมฺปน อาวาสํ หริตฺวา ปริภุญฺชนฺเตน สเจ ตตฺถ พุฑฺฒตโร อาคนฺตฺวา วุฏฺฐาเปติ มยา อิทํ อสุกาวาสโต นาม อาหฏํ คจฺฉามิ ตํ ปากติกํ กโรมีติ วตฺตพฺพํ ฯ สเจ โส ภิกฺขุ อหํ ปากติกํ กริสฺสามีติ วทติ ตสฺส ภารํ กตฺวาปิ คนฺตุํ วฏฺฏตีติ สงฺเขปฏฺฐกถายํ วุตฺตํ ฯ

จมฺปาวตฺถุมฺหิ ฯ เตกตุลาติ ติลตณฺฑุลมุคฺเคหิ วา ติลตณฺฑุลมาเสหิ วา ติลตณฺฑุลกุลตฺเถหิ วา ติลตณฺฑุเลหิ สทฺธึ ยงฺกิญฺจิ เอตํ อปรนฺนํ ปกฺขิปิตฺวา ตีหิ กตา ฯ เอตํ กิร อิเมหิ ตีหิ จตุพฺภาคอุทกสมฺภินฺเน ขีเร สปฺปิมธุสกฺกราทีหิ โยเชตฺวา กโรนฺติ ฯ ราชคหวตฺถุมฺหิ ฯ มธุโคฬโกติ อติรสปูโว วุจฺจติ มธุสีสกนฺติปิ วทนฺติ ฯ เสสเมตฺถ วตฺถุทฺวเยปิ โอทนภาชนียวตฺถุสฺมึ วุตฺตนเยน เวทิตพฺพํ ฯ {๑๕๘} อชฺชุกวตฺถุสฺมึ ฯ เอตทโวจาติ คิลาโน หุตฺวา อโวจ ฯ อายสฺมา อุปาลิ อายสฺมโต อชฺชุกสฺส ปกฺโขติ น อคติคมนวเสน ปกฺโข อปิจ โข อนาปตฺติสญฺญิตาย ลชฺชิอนุคฺคเหน วินยานุคฺคเหน จ เถโร ปกฺโขติ เวทิตพฺโพ ฯ เสสเมตฺถ อุตฺตานตฺถเมว ฯ {๑๕๙} พาราณสีวตฺถุมฺหิ ฯ โจเรหิ อุปฺปทฺทุตนฺตึ โจเรหิ วิลุตฺตํ ฯ อิทฺธิยา อาเนตฺวา ปาสาเท ฐเปสีติ เถโร กิร ตํ กุลํ โสกสลฺลสมปฺปิตํ อาวฏฺฏนฺตํ วิวฏฺฏนฺตํ ทิสฺวา ตสฺส กุลสฺส อนุกมฺปาย ปสาทานุรกฺขณตฺถาย ธมฺมานุคฺคเหน อตฺตโน อิทฺธิยา เตสํเยว ปาสาทํ ทารกานํ สมีเป โหตูติ อธิฏฺฐาสิ ฯ ทารกา อมฺหากํ ปาสาโทติ สญฺชานิตฺวา อภิรุหึสุ ฯ ตโต เถโร อิทฺธึ ปฏิสํหริ ฯ ปาสาโทปิ สกฏฺฐาเนเยว อฏฺฐาสิ ฯ โวหารวเสน ปน วุตฺตํ เต ทารเก อิทฺธิยา อาเนตฺวา ปาสาเท ฐเปสีติ ฯ อิทฺธิวิสเยติ อีทิสาย อธิฏฺฐานิทฺธิยา อนาปตฺติ ฯ วิกุพฺพนอิทฺธิ ปน น วฏฺฏตีติ ฯ {๑๖๐-๑๖๑} อวสาเน วตฺถุทฺวยํ อุตฺตานตฺถเมวาติ ฯ