ตสฺส กุกฺกุจฺจํ อโหสิเยว ฯ นทิยา อานุภาเวน อปฺปมตฺตกมฺปิ ปาปํ ปหีนนฺนาม นตฺถิ ฯ อหุ วิปฏิสาโรติ ตสฺเสว กุกฺกุจฺจสฺส สภาวนิยมนตฺถเมตํ วุตฺตํ ฯ วิปฏิสารกุกฺกุจฺจํ อโหสิ น วินยกุกฺกุจฺจนฺติ ฯ อลาภา วต เมติอาทิ กุกฺกุจฺจสฺส ปวตฺติอาการทสฺสนตฺถํ วุตฺตํ ฯ ตตฺถ อลาภา วต เมติ อายตึ ทานิ มม หิตสุขลาภา นาม นตฺถีติ อนุตฺถุนาติ ฯ น วต เม ลาภาติ อิมินา ปน ตเมวตฺถํ ทฬฺหํ กโรติ ฯ อยํ เหตฺถ อธิปฺปาโย สเจปิ โกจิ ลาโภ เตติ วเทยฺย ตํ มิจฺฉา นตฺเถว เม ลาภาติ ฯ ทุลฺลทฺธํ วต เมติ กุสลานุภาเวน ลทฺธมฺปิ อิทํ มนุสฺสตฺตํ ทุลฺลทฺธํ วต เม ฯ น วต เม สุลทฺธนฺติ อิมินา ปน ตเมว อตฺถํ ทฬฺหํ กโรติ ฯ อยํ เหตฺถ อธิปฺปาโย สเจปิ โกจิ สุลทฺธนฺเตติ วเทยฺย ตํ มิจฺฉา น วต เม สุลทฺธนฺติ ฯ อปุญฺญํ ปสุตนฺติ อปุญฺญํ อุปจิตํ ชนิตํ วา ฯ กสฺมา อิติ เจ ฯ ยฺวาหํ ภิกฺขู ฯเปฯ โวโรเปสินฺติ ฯ ตสฺสตฺโถ โย อหํ สีลวนฺเต ตาย เอว สีลวนฺตตาย กลฺยาณธมฺเม อุตฺตมธมฺเม เสฏฺฐธมฺเม ภิกฺขู ชีวิตา โวโรเปสินฺติ ฯ อญฺญตรา มารกายิกาติ นามวเสน อปากฏา เอกา ภุมฺมเทวตา มิจฺฉาทิฏฺฐิกา มารปกฺขิกา มารสฺส อนุวตฺติกา เอวํ อยํ มารเธยฺยํ มารวิสยํ นาติกฺกมิสฺสตีติ จินฺเตตฺวา สพฺพาภรณวิภูสิตา หุตฺวา อตฺตโน อานุภาวํ ทสฺสยมานา อภิชฺชมาเน อุทเก ปฐวีตเล จงฺกมมานา วิย อาคนฺตฺวา มิคลณฺฑิกํ สมณกุตฺตกํ เอตทโวจ ฯ สาธุ สาธูติ สมฺปหํสนตฺเถ นิปาโต ฯ ตสฺมา เอวญฺเจตฺถ ทฺวิวจนํ ๑- ฯ อติณฺเณ ตาเรสีติ สํสารโต อติณฺเณ อิมินา ชีวิตาโวโรปเนน ตาเรสิ ปริโมเจสีติ ฯ อยํ กิร เอติสฺสา เทวตาย พาลาย ทุมฺเมธาย ลทฺธิ เย น มตา เต สํสารโต น มุตฺตา เย มตา เต มุตฺตาติ ฯ ตสฺมา สํสารโมจกมิลกฺขุ ๒- วิย เอวํลทฺธิกา หุตฺวา ตมฺปิ ตตฺถ นิโยเชนฺตี เอวมาห ฯ อถโข มิคลณฺฑิโก สมณกุตฺตโก ตาวภุสํ อุปฺปนฺนวิปฏิสาโรปิ ตํ เทวตาย อานุภาวํ ทิสฺวา อยํ เทวตา เอวมาห อทฺธา อิมินา อตฺเถน เอวเมว ภวิตพฺพนฺติ นิฏฺฐํ คนฺตฺวา ลาภา กิร เมติอาทีนิ ปริกิตฺตยนฺโต วิหาเรน วิหารํ ปริเวเณน ปริเวณํ อุปสงฺกมิตฺวา เอวํ วเทติ ตํตํ วิหารญฺจ ปริเวณญฺจ อุปสงฺกมิตฺวา ทฺวารํ วิวริตฺวา อนฺโต ปวิสิตฺวา ภิกฺขู เอวํ วเทติ โก อติณฺโณ กนฺตาเรมีติ ฯ โหติเยว ภยนฺติ มรณํ ปฏิจฺจ จิตฺตุตฺราโส โหติ ฯ ฉมฺภิตตฺตนฺติ หทยมํสํ อาทึ กตฺวา สรีรจลนํ โหติ ฯ อติภเยน ถทฺธสรีรตฺตนฺติปิ เอเก ฯ ถมฺภิตตฺตํ หิ ฉมฺภิตตฺตนฺติ วุจฺจติ ฯ โลมหํโสติ อุทฺธํฐิตโลมตา ฯ ขีณาสวา ปน สตฺตสุญฺญตาย สุทิฏฺฐตฺตา มรณกสตฺตเมว น ปสฺสนฺติ ฯ ตสฺมา เตสํ สพฺพมฺเปตํ นาโหสีติ เวทิตพฺพํ ฯ เอกมฺปิ เทฺวปิ ฯเปฯ สฏฺฐึปิ ภิกฺขู เอกาเหเนว ชีวิตา โวโรเปสีติ เอวํ คณนวเสน สพฺพานิปิ ตานิ ปญฺจ ภิกฺขุสตานิ ชีวิตา โวโรเปสิ ฯ