ตสฺมา อิทานิ เจปิ โกจิ ภิกฺขุ อุตฺตริมนุสฺสธมฺมาธิคมํ พฺยากเรยฺย น โส เอตฺตาวตาว สกฺกาตพฺโพ ฯ อิเมสุ ปน ฉสุ ฐาเนสุ โสธนตฺถํ วตฺตพฺโพ กินฺเต อธิคตํ กึ ฌานํ อุทาหุ วิโมกฺขาทีสุ อญฺญตรนฺติ ฯ โย หิ เยน อธิคโต ธมฺโม โส ตสฺส ปากโฏ โหติ ฯ สเจ อิทนฺนาม เม อธิคตนฺติ วทติ ตโต กินฺติ เต อธิคตนฺติ ปุจฺฉิตพฺโพ อนิจฺจลกฺขณาทีสุ กึ ธุรํ กตฺวา อฏฺฐตฺตึสาย วา อารมฺมเณสุ รูปารูปอชฺฌตฺตพหิทฺธาทิเภเทสุ วา ธมฺเมสุ เกน มุเขน อภินิวิสิตฺวาติ ฯ โย หิ ยสฺสาภินิเวโส โส ตสฺส ปากโฏ โหติ ฯ สเจ อยนฺนาม เม อภินิเวโส เอวํ มยา อธิคตนฺติ วทติ ตโต กทา เต อธิคตนฺติ ปุจฺฉิตพฺโพ กึ ปุพฺพณฺเห อุทาหุ มชฺฌนฺติกาทีสุ อญฺญตรสฺมึ กาเลติ ฯ สพฺเพสํ หิ อตฺตนา อธิคตกาโล ปากโฏ โหติ ฯ สเจ อมุกสฺมึ นาม กาเล อธิคตนฺติ วทติ ตโต กตฺถ เต อธิคตนฺติ ปุจฺฉิตพฺโพ กึ ทิวาฏฺฐาเน อุทาหุ รตฺติฏฺฐานาทีสุ อญฺญตรสฺมึ โอกาเสติ ฯ สพฺเพสํ หิ อตฺตนา อธิคโตกาโส ปากโฏ โหติ ฯ สเจ อมุกสฺมึ นาม เม โอกาเส อธิคตนฺติ วทติ ตโต กตเม เต กิเลสา ปหีนาติ ปุจฺฉิตพฺโพ กึ ปฐมมคฺควชฺฌา อุทาหุ ทุติยาทิมคฺควชฺฌาติ ฯ สพฺเพสํ หิ อตฺตนา อธิคตมคฺเคน ปหีนกฺกิเลสา ปากฏา โหนฺติ ฯ สเจ อิเม นาม เม กิเลสา ปหีนาติ วทติ ตโต กตเมสํ ตฺวํ ธมฺมานํ ลาภีติ ปุจฺฉิตพฺโพ กึ โสตาปตฺติมคฺคสฺส อุทาหุ สกทาคามิมคฺคาทีสุ อญฺญตรสฺสาติ ฯ สพฺเพสํ หิ อตฺตนา อธิคตธมฺโม ปากโฏ โหติ ฯ สเจ อิเมสํ นามาหํ ธมฺมานํ ลาภีติ วทติ เอตฺตาวตาปิสฺส วจนํ น สทฺธาตพฺพํ ฯ พหุสฺสุตา หิ อุคฺคหปริปุจฺฉากุสลา ภิกฺขู อิมานิ ฉฏฺฐานานิ โสเธตุํ สกฺโกนฺติ ฯ อิมสฺส ปน ภิกฺขุโน อาคมนปฏิปทา โสเธตพฺพา ฯ ยทิ อาคมนปฏิปทา น สุชฺฌติ อิมาย ปฏิปทาย โลกุตฺตรธมฺโม นาม น ลพฺภตีติ อปเนตพฺโพ ฯ ยทิ ปนสฺส อาคมนปฏิปทา สุชฺฌติ ทีฆรตฺตํ ตีสุ สิกฺขาสุ อปฺปมตฺโต ชาคริยมนุยุตฺโต จตูสุ ปจฺจเยสุ อลคฺโค อากาเส ปาณิสเมน เจตสา วิหรตีติ ปญฺญายติ ตสฺส ภิกฺขุโน พฺยากรณํ ปฏิปทาย สทฺธึ สํสนฺทติ เสยฺยถาปิ นาม คงฺโคทกํ ยมุโนทเกน สทฺธึ สํสนฺทติ สเมติ เอวเมว สุปฺปญฺญตฺตา เตน ภควตา สาวกานํ นิพฺพานคามินี ปฏิปทา สํสนฺทติ นิพฺพานญฺจ ปฏิปทา จาติ วุตฺตสทิสํ โหติ ฯ อปิจ โข น เอตฺตเกนาปิ สกฺกาโร กตฺตพฺโพ ฯ กสฺมา ฯ เอกจฺจสฺส หิ ปุถุชฺชนสฺสาปิ สโต ขีณาสวปฏิปตฺติสทิสา ปฏิปทา โหติ ฯ ตสฺมา โส ภิกฺขุ เตหิ เตหิ อุปาเยหิ อุตฺตาเสตพฺโพ ฯ ขีณาสวสฺส นาม อสนิยาปิ มตฺถเก ปตมานาย ภยํ วา ฉมฺภิตตฺตํ วา โลมหํโส วา น โหติ ฯ สจสฺส ภยํ วา ฉมฺภิตตฺตํ วา โลมหํโส วา อุปฺปชฺชติ น ตฺวํ อรหาติ อปเนตพฺโพ ฯ สเจ ปน อภีรุ อจฺฉมฺภี อนุตฺราสี หุตฺวา สีโห วิย นิสีทติ อยํ ภิกฺขุ สมฺปนฺนเวยฺยากรโณ สมนฺตา ราชราชมหามตฺตาทีหิ เปสิตํ สกฺการํ อรหตีติ ฯ