โสภิตวตฺถุสฺมึ ฯ อหํ อาวุโส ปญฺจกปฺปสตานิ อนุสฺสรามีติ เอกาวชฺชเนน อนุสฺสรามีติ อาห ฯ อิตรถา หิ อนจฺฉริยํ อริยสาวกานํ ปฏิปาฏิยา นานาวชฺชเนน ตสฺส ตสฺส อตีตนิวาสสฺส อนุสฺสรณนฺติ น ภิกฺขู อุชฺฌาเยยฺยุํ ฯ ยสฺมา ปเนส เอกาวชฺชเนน อนุสฺสรามีติ อาห ตสฺมา ภิกฺขู อุชฺฌายึสุ ฯ อตฺเถสา ภิกฺขเว โสภิตสฺส สา จ โข เอกาเยว ชาตีติ ยํ โสภิโต ชาตึ อนุสฺสรามีติ อาห อตฺเถสา ชาติ โสภิตสฺส สา จ โข เอกาเยว อนนฺตรา น อุปฺปฏิปาฏิยา อนุสฺสริตาติ อธิปฺปาโย ฯ กถํ ปนายํ เอตํ อนุสฺสรีติ ฯ อยํ กิร ปญฺจนฺนํ กปฺปสตานํ อุปริ ติตฺถายตเน ปพฺพชิตฺวา อสญฺญิสมาปตฺตึ นิพฺพตฺเตตฺวา อปริหีนชฺฌาโน กาลํ กตฺวา อสญฺญิภเว นิพฺพตฺติ ฯ ตตฺถ ยาวตายุกํ ฐตฺวา อวสาเน มนุสฺสโลเก อุปฺปนฺโน สาสเน ปพฺพชิตฺวา ติสฺโส วิชฺชา สจฺฉากาสิ ฯ โส ปุพฺเพนิวาสํ อนุสฺสรมาโน อิมสฺมึ อตฺตภาเว ปฏิสนฺธึ ทิสฺวา ตโต ปรํ ตติเย อตฺตภาเว จุติเมว อทฺทส ฯ อถ อุภินฺนมนฺตรา อจิตฺตกํ อตฺตภาวํ อนุสฺสริตุํ อสกฺโกนฺโต นยโต สลฺลกฺเขสิ อทฺธาหํ อสญฺญิภเว นิพฺพตฺโตติ ฯ เอวํ สลฺลกฺเขนฺเตน เตน ทุกฺกรํ กตํ สตฺตธา ภินฺนสฺส วาลสฺส โกฏิยา โกฏิ ปฏิวิทฺธา อากาเส ปทํ ทสฺสิตํ ตสฺมา นํ ภควา อิมสฺมึเยว วตฺถุสฺมึ เอตทคฺเค ฐเปสิ เอตทคฺคํ ภิกฺขเว มม สาวกานํ ภิกฺขูนํ ปุพฺเพนิวาสํ อนุสฺสรนฺตานํ ยทิทํ โสภิโตติ ฯ