{๒๓๓} อุทฺทิฏฺฐา โข อายสฺมนฺโต จตฺตาโร ปาราชิกา ธมฺมาติ อิทํ อิธ อุทฺทิฏฺฐปาราชิกปริทีปนเมว ฯ สโมธาเนตฺวา ปน สพฺพาเนว จตุวีสติ ปาราชิกานิ เวทิตพฺพานิ ฯ กตมานิ จตุวีสติ ฯ ปาลิอาคตานิ ตาว ภิกฺขูนํ จตฺตาริ ภิกฺขุนีนํ อสาธารณานิ จตฺตารีติ อฏฺฐ ฯ เอกาทส อภพฺพปุคฺคลา ฯ เตสุ ปณฺฑกติรจฺฉานคตอุภโตพฺยญฺชนโก ตโย วตฺถุวิปนฺนา อเหตุกปฏิสนฺธิกา ฯ เตสํ สคฺโค อวาริโต มคฺโค ปน วาริโต ฯ อภพฺพา หิ เต มคฺคปฏิลาภาย วตฺถุวิปนฺนตฺตา ฯ ปพฺพชฺชาปิ เนสํ ปฏิกฺขิตฺตา ฯ ตสฺมา เตปิ ปาราชิกา ฯ เถยฺยสํวาสโก ติตฺถิยปกฺกนฺตโก มาตุฆาตโก ปิตุฆาตโก อรหนฺตฆาตโก ภิกฺขุนีทูสโก รุหิรุปฺปาทโก สงฺฆเภทโกติ อิเม อฏฺฐ อตฺตโน กิริยาย วิปนฺนตฺตา อภพฺพฏฺฐานํ ปตฺตาติ ปาราชิกา จ ฯ เตสุ เถยฺยสํวาสโก ติตฺถิยปกฺกนฺตโก ภิกฺขุนีทูสโกติ อิเมสํ ติณฺณํ สคฺโค อวาริโต มคฺโค ปน วาริโตว ฯ อิตเรสํ ปญฺจนฺนํ อุภยมฺปิ วาริตํ ฯ เตหิ อนนฺตรา นรเก นิพฺพตฺตนกสตฺตา ฯ อิติ อิเม จ เอกาทส ปุริมา จ อฏฺฐ เอกูนวีสติ ฯ เตปิ คิหิลิงฺเค รุจึ อุปฺปาเทตฺวา คิหินิวาสํ นิวตฺถาย ภิกฺขุนิยา สทฺธึ วีสติ ฯ สา หิ อชฺฌาจารวีติกฺกมํ อกตฺวาปิ เอตฺตาวตา อสฺสมณีติ อิมานิ ตาว วีสติ ปาราชิกานิ ฯ อปรานิปิ ลมฺพี มุทุปิฏฺฐิโก ปรสฺส องฺคชาตํ มุเขน คณฺหาติ ปรสฺส องฺคชาเต อภินิสีทตีติ อิเมสํ จตุนฺนํ วเสน จตฺตาริ อนุโลมปาราชิกานีติ วทนฺติ ฯ เอตานิ หิ ยสฺมา อุภินฺนํ ราควเสน สทิสภาวูปคตานํ ธมฺโม เมถุนธมฺโมติ วุจฺจติ ตสฺมา เอเตน ปริยาเยน เมถุนธมฺมํ อปฏิเสวิตฺวาเยว เกวลํ มคฺเคน มคฺคปฺปเวสนวเสน อาปชฺชิตพฺพตฺตา เมถุนธมฺมปาราชิกสฺส อนุโลเมนฺตีติ อนุโลมปาราชิกานีติ วุจฺจนฺตีติ ฯ อิติ อิมานิ จตฺตาริ ปุริมานิ จ วีสติ สโมธาเนตฺวา สพฺพาเนว จตุวีสติ ปาราชิกานิ เวทิตพฺพานิ ฯ น ลภติ ภิกฺขูหิ สทฺธึ สํวาสนฺติ อุโปสถปฺปวารณาปาฏิโมกฺขุทฺเทสสงฺฆกมฺมปฺปเภทํ ภิกฺขูหิ สทฺธึ สํวาสํ น ลภติ ฯ ยถา ปุเร ตถา ปจฺฉาติ ยถา ปุพฺเพ คิหิกาเล จ อนุปสมฺปนฺนกาเล จ ปจฺฉา ปาราชิกํ อาปนฺโนปิ ตเถว อสํวาโส โหติ ฯ นตฺถิ ตสฺส ภิกฺขูหิ สทฺธึ อุโปสถปฺปวารณา- ปาฏิโมกฺขุทฺเทสสงฺฆกมฺมปฺปเภโท สํวาโสติ ภิกฺขูหิ สทฺธึ สํวาสํ น ลภติ ฯ ตตฺถายสฺมนฺเต ปุจฺฉามีติ เตสุ จตูสุ ปาราชิเกสุ อายสฺมนฺเต กจฺจิตฺถ ปริสุทฺธาติ ปุจฺฉามิ ฯ กจฺจิตฺถาติ กจฺจิ เอตฺถ เอเตสุ จตูสุ ปาราชิเกสุ กจฺจิ ปริสุทฺธาติ อตฺโถ ฯ อถวา กจฺจิตฺถ ปริสุทฺธาติ กจฺจิ ปริสุทฺธา ภวถาติ อตฺโถ ฯ เสสํ สพฺพตฺถ อุตฺตานตฺถเมวาติ ฯ