{๒๖๒} เจเตติ น อุปกฺกมตีติ อาทีสุ ฯ โมจนสฺสาทเจตนาย เจเตติ น อุปกฺกมติ มุจฺจติ อนาปตฺติ ฯ โมจนสฺสาทปีฬิโต อโห วต มุจฺเจยฺยาติ เจเตติ น อุปกฺกมติ น มุจฺจติ อนาปตฺติ ฯ โมจนสฺสาเทน น เจเตติ ผสฺสสฺสาเทน กณฺฑวนสฺสาเทน วา อุปกฺกมติ มุจฺจติ อนาปตฺติ ฯ ตเถว น เจเตติ อุปกฺกมติ น มุจฺจติ อนาปตฺติ ฯ กามวิตกฺกํ วิตกฺเกนฺโต โมจนตฺถาย น เจเตติ น อุปกฺกมติ มุจฺจติ อนาปตฺติ ฯ สเจ ปนสฺส วิตกฺกยโตปิ น มุจฺจติ ฯ อิทํ อาคตเมว โหติ น เจเตติ น อุปกฺกมติ น มุจฺจติ อนาปตฺตีติ ฯ อนาปตฺติ สุปินนฺเตนาติ สุตฺตสฺส สุปิเน เมถุนธมฺมํ ปฏิเสวนฺตสฺส วิย กายสํสคฺคาทีนิ อาปชฺชนฺตสฺส วิย สุปินนฺเตว การเณน ยสฺส อสุจิ มุจฺจติ ตสฺส อนาปตฺติ ฯ สุปิเน ปน อุปฺปนฺนาย อสฺสาทเจตนาย สจสฺส วิสโย โหติ นิจฺจเลน ภวิตพฺพํ น หตฺเถน นิมิตฺตํ กีฬาเปตพฺพํ ฯ กาสาวปจฺจตฺถรณรกฺขณตฺถํ ปน หตฺถปุเฏน คเหตฺวา ชคฺคนตฺถาย อุทกฏฺฐานํ คนฺตุํ วฏฺฏติ ฯ นโมจนาธิปฺปายสฺสาติ ยสฺส เภสชฺเชน วา นิมิตฺตํ อาลิมฺเปนฺตสฺส อุจฺจาราทีนิ วา กโรนฺตสฺส นโมจนาธิปฺปายสฺส มุจฺจติ ตสฺสาปิ อนาปตฺติ ฯ อุมฺมตฺตกสฺส ทุวิธสฺสาปิ อนาปตฺติ ฯ อิธ เสยฺยสโก อาทิกมฺมิโก ฯ ตสฺส อนาปตฺติ อาทิกมฺมิกสฺสาติ ฯ

ปทภาชนียวณฺณนา นิฏฺฐิตา ฯ

สมุฏฺฐานาทีสุ ฯ อิทํ สิกฺขาปทํ ปฐมปาราชิกสมุฏฺฐานํ กายจิตฺตโต สมุฏฺฐาติ กิริยา สญฺญาวิโมกขํ สจิตฺตกํ โลกวชฺชํ กายกมฺมํ อกุสลจิตฺตํ ทุเวทนํ สุขมชฺฌตฺตทฺวเยนาติ ฯ

{๒๖๓} วินีตวตฺถูสุ สุปินวตฺถุ อนุปฺปญฺญตฺติยํ วุตฺตนยเมว ฯ อุจฺจารปสฺสาววตฺถูนิ อุตฺตานตฺถาเนว ฯ วิตกฺกวตฺถุสฺมึ กามวิตกฺกนฺติ เคหสิตกามวิตกฺกํ ฯ ตตฺถ กิญฺจาปิ อนาปตฺติ วุตฺตา อถโข วิตกฺกคติเกน น ภวิตพฺพํ ฯ อุณฺโหทกวตฺถุ ปฐมํ อุตฺตานเมว ฯ ทุติเย โส ภิกฺขุ โมเจตุกาโม อุณฺโหทเกน นิมิตฺตํ ปหริตฺวา ปหริตฺวา นหายิ ฯ เตนสฺส อาปตฺติ วุตฺตา ฯ ตติเย อุปกฺกมสฺส อตฺถิตาย ถุลฺลจฺจยํ ฯ เภสชฺชกณฺฑวนวตฺถูนิ อุตฺตานตฺถาเนว ฯ