ยถานิทฺทิฏฺฐนิทฺเทเส ครุกํ ตตฺถ น ทิสฺสตีติ ฯ อสฺสาปายํ ลทฺธิ อิตฺถิยา อิตฺถีสญฺญิโน หิ สงฺฆาทิเสโส วุตฺโต อิมินา จ อิตฺถีสญฺญา วิราคิตา กายปฏิพทฺเธ กายปฏิพทฺธสญฺญา อุปฺปาทิตา ตํ คณฺหนฺตสฺส ปน ถุลฺลจฺจยํ วุตฺตํ ฯ อิมินา จ คหณมฺปิ วิราคิตํ ตํ อคฺคเหตฺวา อิตฺถี คหิตา ตสฺมา เอตฺถ อิตฺถีสญฺญาย อภาวโต สงฺฆาทิเสโส น ทิสฺสติ กายปฏิพทฺธสฺส อคฺคหิตตฺตา ถุลฺลจฺจยํ น ทิสฺสติ กายสํสคฺคราเคน ผุฏฺฐตฺตา ปน ทุกฺกฏํ กายสํสคฺคราเคน หิ อิมนฺนาม วตฺถุํ ผุสโต อนาปตฺตีติ นตฺถิ ตสฺมา ทุกฺกฏเมวาติ ฯ อิทญฺจ ปน วตฺวา อิมํ จตุกฺกมาห สารตฺตํ คณฺหิสฺสามีติ สารตฺตํ คณฺหิ สงฺฆาทิเสโส วิรตฺตํ คณฺหิสฺสามีติ วิรตฺตํ คณฺหิ ทุกฺกฏํ สารตฺตํ คณฺหิสฺสามีติ วิรตฺตํ คณฺหิ ทุกฺกฏํ วิรตฺตํ คณฺหิสฺสามีติ สารตฺตํ คณฺหิ ทุกฺกฏเมวาติ ฯ กิญฺจาปิ เอวมาห อถโข มหาสุมตฺเถรวาโทเยว เจตฺถ อิตฺถี จ โหติ อิตฺถีสญฺญี สารตฺโต จ ภิกฺขุ จ นํ อิตฺถิยา กาเยน กายปฏิพทฺธํ อามสติ ปรามสติ คณฺหาติ ฉุปติ อาปตฺติ ถุลฺลจฺจยสฺสาติ อิมาย ปาลิยา โย หิ เอกโต ฐิตา สมฺพหุลา อิตฺถิโย พาหาหิ ปริกฺขิปิตฺวา คณฺหาติ โส ยตฺตกา อิตฺถิโย ผุฏฺฐา ตาสํ คณนาย สงฺฆาทิเสเส อาปชฺชติ มชฺฌคตานํ ถุลฺลจฺจเยติ อาทีหิ อฏฺฐกถาวินิจฺฉเยหิ จ สเมติ ฯ ยทิ หิ สญฺญาทิวิราเคน วิราคิตํ นาม ภเวยฺย ปณฺฑโก จ โหติ อิตฺถีสญฺญีติ อาทีสุ วิย กายปฏิพทฺธญฺจ โหติ กายสญฺญี จาติ อาทินา จ นเยน ปาลิยา วิเสสํ วเทยฺย ฯ ยสฺมา ปน โส น วุตฺโต ตสฺมา อิตฺถิยา อิตฺถีสญฺญาย สติ อิตฺถึ อามสนฺตสฺส สงฺฆาทิเสโส กายปฏิพทฺธํ อามสนฺตสฺส ถุลฺลจฺจยนฺติ ยถาวตฺถุกเมว ยุชฺชติ ฯ มหาปจฺจริยมฺปิ เจตํ วุตฺตํ นีลํ ปารุปิตฺวา สยิตาย กาฬิตฺถิยา กายํ ฆฏฺเฏสฺสามีติ กายํ ฆฏเฏติ สงฺฆาทิเสโส กายํ ฆฏเฏสฺสามีติ นีลํ ฆฏฺเฏติ ถุลฺลจฺจยํ นีลํ ฆฏเฏสฺสามีติ กายํ ฆฏเฏติ สงฺฆาทิเสโส นีลํ ฆฏเฏสฺสามีติ นีลํ ฆฏเฏติ ถุลฺลจฺจยนฺติ ฯ โย จายํ อิตฺถี จ ปณฺฑโก จาติ อาทินา นเยน วตฺถุมิสฺสกนโย วุตฺโต ตสฺมิมฺปิ วตฺถุสญฺญาวิมติวเสน วุตฺตา อาปตฺติโย ปาลิยํ อสมฺมุยฺหนฺเตน เวทิตพฺพา ฯ กาเยน กายปฏิพทฺธวาเร ปน อิตฺถิยา อิตฺถีสญฺญิสฺส กายปฏิพทฺธํ คณฺหโต ถุลฺลจฺจยํ เสเส สพฺพตฺถ ทุกฺกฏํ กายปฏิพทฺเธน กายวาเรปิ เอเสว นโย ฯ กายปฏิพทฺเธน กายปฏิพทฺธวาเร จ นิสฺสคฺคิเยน กายวาราทีสุ จสฺส สพฺพตฺถ ทุกฺกฏเมว ฯ อิตฺถี จ โหติ อิตฺถีสญฺญี สารตฺโต จ อิตฺถี จ นํ ภิกฺขุสฺส กาเยน กายนฺติ อาทิวาโร ปน ภิกฺขุมฺหิ มาตุคามสฺส สาราควเสน วุตฺโต ฯ ตตฺถ อิตฺถี จ นํ ภิกฺขุสฺส กาเยน กายนฺติ ภิกฺขุมฺหิ สารตฺตา อิตฺถี ตสฺส นิสินฺโนกาสํ วา นิปฺปนฺโนกาสํ วา คนฺตฺวา อตฺตโน กาเยน ตํ ภิกฺขุสฺส กายํ อามสติ ฉุปติ ฯ เสวนาธิปฺปาโย กาเยน วายมติ ผสฺสํ ปฏิวิชานาตีติ เอวํ ตาย อามฏฺโฐ วา ฉุปิโต วา เสวนาธิปฺปาโย หุตฺวา สเจ ผสฺสํ ปฏิวิชานนตฺถํ อีสกมฺปิ กายํ จาเลติผนฺเทติ สงฺฆาทิเสสํ อาปชฺชติ ฯ เทฺว อิตฺถิโยติ เอตฺก เทฺว สงฺฆาทิเสเส อาปชฺชติ ฯ อิตฺถิยา จ ปณฺฑเก จ สงฺฆาทิเสเสน สห ทุกฺกฏํ ฯ เอเตน อุปาเยน ยาว นิสฺสคฺคิเยน นิสฺสคฺคิยํ อามสติ เสวนาธิปฺปาโย กาเยน วายมติ น จ ผสฺสํ ปฏิวิชานาติ อาปตฺติ ทุกฺกฏสฺสาติ ตาว ปุริมนเยเนว อาปตฺติเภโท เวทิตพฺโพ ฯ เอตฺถ จ กาเยน วายมติ น จ ผสฺสํ ปฏิวิชานาตีติ อตฺตนา นิสฺสฏฺฐํ ปุปฺผํ วา ผลํ วา อิตฺถึ อตฺตโน นิสฺสคฺคิเยน ปุปฺเผน วา ผเลน วา ปหรนฺตึ ทิสฺวา กาเยน วิการํ กโรติ องฺคุลึ วา จาเลติ ภมุกํ วา อุกฺขิปติ อกฺขึ วา นิขนติ อญฺญํ วา เอวรูปํ วิการํ กโรติ อยํ วุจฺจติ กาเยน วายมติ น จ ผสฺสํ ปฏิวิชานาตีติ ฯ อยมฺปิ กาเยน วายมิตตฺตา ทุกฺกฏํ อาปชฺชติ ฯ ทวีสุ อิตฺถีสุ เทฺว ปณฺฑกอิตฺถีสุ เทฺวเอว ทุกฺกเฏ อาปชฺชติ ฯ