อนามาโส ฯ ปานียสงฺโข โธโตปิ อโธโตปิ อามาโสว ฯ เสสญฺจ อญฺชนาทิเภสชฺชตฺถายปิ ภณฺฑมูลตฺถายปิ สมฺปฏิจฺฉิตุํ วฏฺฏติ ฯ สิลา โธตวิทฺธา รตนสํยุตฺตา มุคฺควณฺณา ว อนามาสา ฯ เสสา สตฺถกนิสทาทิอตฺถาย คณฺหิตุํ วฏฺฏติ ฯ เอตฺถ จ รตนสํยุตฺตาติ สุวณฺเณน สทฺธึ โยเชตฺวา ปจิตฺวา กตาติ วทนฺติ ฯ ปพาฬํ โธตวิทฺธํ อนามาสํ ฯ เสสํ อามาสญฺจ ภณฺฑมูลตฺถญฺจ สมฺปฏิจฺฉิตุํ วฏฺฏติ ฯ มหาปจฺจริยํ ปน โธตมฺปิ อโธตมฺปิ สพฺพํ อนามาสญฺจ น จ สมฺปฏิจฺฉิตุํ วฏฺฏตีติ วุตฺตํ ฯ รชตญฺจ ชาตรูปญฺจ กตภณฺฑมฺปิ สพฺเพน สพฺพํ วีชโต ปฏฐาย อนามาสญฺจ อสมฺปฏิจฺฉิยญฺจ ฯ อุตฺตรราปุตฺโต กิร สุวณฺณเจติยํ กาเรตฺวา มหาปทุมตฺเถรสฺส เปเสสิ ฯ เถโร น กปฺปตีติ ปฏิกฺขิปิ ฯ เจติยฆเร สุวณฺณปทุมสุวณฺณพุพฺพุฬกาทีนิ โหนฺติ เอตานิปิ อนามาสานิ ฯ เจติยฆรโคปกา ปน รูปิยฉฑฺฑกฏฺฐาเน ฐิตา ตสฺมา เตสํ เกฬายิตุํ วฏฺฏตีติ วุตฺตํ ฯ กุรุนฺทิยํ ปน ตํ ปฏิกฺขิตฺตํ ฯ สุวณฺณเจติเย กจวรเมว หริตุํ วฏฺฏตีติ เอตฺตกเมว อนุญฺญาตํ ฯ อารกูฏโลหมฺปิ ชาตรูปคติกเมว อนามาสนฺติ สพฺพอฏฺฐกถาสุ วุตฺตํ ฯ เสนาสนปริโภโค ปน สพฺโพ กปฺปิโย ตสฺมา ชาตรูปรชตมยา สพฺเพปิ เสนาสนปริกฺขารา อามาสา ฯ ภิกฺขูนํ ธมฺมวินยวณฺณนฏฺฐาเน รตนมณฺฑเป กโรนฺติ ผฬิกตฺถมฺเภ รตนทามปฏิมณฺฑิเต ตตฺถ สพฺพูปกรณานิ ภิกฺขูนํ ปฏิชคฺคิตุํ วฏฺฏติ ฯ โลหิตกมสารคลฺลา โธตวิทฺธา อนามาสา ฯ อิตเร อามาสา ภณฺฑมูลตฺถาย จ วฏฺฏตีติ วุตฺตา ฯ มหาปจฺจริยํ ปน โธตาปิ อโธตาปิ สพฺพโส อนามาสา น จ สมฺปฏิจฺฉิตุํ วฏฺฏตีติ วุตฺตํ ฯ

สพฺพํ อาวุธภณฺฑํ อนามาสํ ภณฺฑมูลตฺถาย ทียมานมฺปิ น สมฺปฏิจฺฉิตพฺพํ ฯ สตฺถวณิชฺชา นาม น วฏฺฏติ ฯ สุทฺธธนุทณฺโฑปิ ธนุชิยาปิ ปโฏโทปิ องฺกุโสปิ อนฺตมโส วาสีผรสุอาทีนิปิ อาวุธสงฺเขเปน กตานิ อนามาสานิ ฯ สเจ เกนจิ วิหาเร สตฺติ วา โตมโร วา ฐปิโต โหติ วิหารํ ชคฺคนฺเตน หรนฺตูติ สามิกานํ เปเสตพฺพํ ฯ สเจ น หรนฺติ ตํ อจาเลนฺเตน วิหาโร ปฏิชคฺคิตพฺโพ ฯ ยุทฺธภูมิยํ ปติตํ อสึ วา สตฺตึ วา โตมรํ วา ทิสฺวา ปาสาเณน วา เกนจิ วา อสึ ภินฺทิตฺวา สตฺถกตฺถาย คเหตุํ วฏฺฏติ ฯ อิตรานิปิ วิโยเชตฺวา กิญฺจิ สตฺถกตฺถาย กิญฺจิ กตฺตรทณฺฑาทิอตฺถาย คเหตุํ วฏฺฏติ ฯ อิทํ คณฺหาถาติ ทียมานํ ปน วินาเสตฺวา กปฺปิยภณฺฑํ กริสฺสามีติ สพฺพมฺปิ สมฺปฏิจฺฉิตุํ วฏฺฏติ ฯ